ەلورداداعى تاۋەلسىزدىك سارايىنا شانحاي ىنتىماقتاستىق ۇيىمىنا مۇشە مەملەكەتتەردىڭ باسشىلارى ۇيىم كەڭەسىنىڭ شاعىن قۇرامداعى وتىرىسى ق ر پرەزيدەنتى نۇرسۇلتان نازاربايەۆتىڭ توراعالىعىمەن ءوتىپ جاتىر، دەپ حابارلايدى قازاقپارات.
– وسىندا وتىرعان بارلىقتارىڭىزدىڭ اتىنان پرەزيدەنت بولىپ سايلانعاننان كەيىن ءبىزدىڭ مەملەكەت باسشىلارى كەڭەسىمىزگە العاش رەت قاتىسىپ وتىرعان شاۆكات ميرزيەيەۆكە ايرىقشا حوش كەلدىڭىز دەمەكپىن جانە وعان قىزمەتىندە جانە بىرلەسكەن جۇمىسىمىزدا زور تابىستار تىلەيمىن. اعىمداعى جىلى شىۇ-عا 16 جىل تولادى. وسىنداي ساتتە تاريح ەسكە تۇسەدى. 5 مەملەكەت جۇڭگو حالىق رەسپۋبليكاسىمەن شەكارا پروبلەمالارىن شەشىپ، قۇجاتقا قول قويعاننان كەيىن سول كەزدەگى قىتايدىڭ ءتوراعاسى سزيان سزەمين مىرزا ەكەۋىمىز «شەكاراعا قول قويىلعاننان كەيىن جىراقتاپ كەتپەي، ەكونوميكالىق ىنتىماقتاستىق ۇيىمداستىرايىق» دەپ ۇسىنعان ەدىك. وسىلايشا شىۇ دۇنيەگە كەلدى جانە سول تاريحي اكتىگە قول قويۋ راسىمىنە قاتىسقان راحمون مىرزا ەكەۋىمىز بارلىعىنا كۋا بولىپ كەلەمىز، – دەدى وتىرىستى اشقان مەملەكەت باسشىسى.
ق ر پرەزيدەنتى ۇيىم سول ۋاقىتتان باستاپ حالىقارالىق تانىمالدىققا يە بولىپ، كوپبەيىندى ءوزارا ءىس-قيمىلدىڭ ءتيىمدى الاڭىنا اينالعانىن، وڭىردەگى قاۋىپسىزدىك نىعايتۋ، ەكونوميكالىق ىنتىماقتاستىقتى تەرەڭدەتۋ، مۇشە ەلدەر اراسىنداعى مادەني-گۋمانيتارلىق ىنتىماقتاستىقتى كەڭەيتۋ بويىنشا ۇلكەن جۇمىستار اتقارىلعانىن اتاپ ءوتتى.
سالماقتى شارتتىق-قۇقىقتىق بازا قالىپتاستىرىلىپ، مىعىم ينستيتۋسيونالدىق نەگىز قۇرىلعان، وڭىرلىك جانە جاھاندىق مارتەبەسى كۇشەيە تۇسكەندىگىن ايتتى.
– استانا سامميتىندە ءبىزدىڭ ۇيىمىمىزدىڭ جاڭا تاريحى باستالادى دەپ ايتساق تا بولادى. بۇل جولعى وتىرىس بۇعان دەيىنگىدەي التىجاقتى فورماتتا سوڭعى رەت وتكەلى وتىر. بۇگىن ءبىز ءۇندىستان مەن پاكىستان يسلام رەسپۋبليكاسىن شىۇ-عا قابىلداۋ پروسەسىن اياقتاپ، مۇشە مەملەكەت مارتەبەسىن بەرۋ تۋرالى شەشىمگە قول قويۋعا ۋاعدالاستىق. جاڭا مۇشەنى قابىلداۋ ۇيىمنىڭ دامۋىنا جاڭا تىڭ سەرپىن بەرىپ، ونىڭ حالىقارالىق بەدەلىنىڭ وسۋىنە ءوز سەپتىگىن تيگىزەدى، – دەدى نۇرسۇلتان نازاربايەۆ.
شاعىن قۇرامداعى وتىرىسقا قحر ءتوراعاسى سي سزينپين، وزبەكستان پرەزيدەنتى شاۆكات ميرزيەيەۆ، قىرعىزستان پرەزيدەنتى المازبەك اتامبايەۆ، رەسەي پرەزيدەنتى ۆلاديمير پۋتين، تاجىكستان پرەزيدەنتى ەمومالي راحمون قاتىسۋدا.
