Astana qalasynyń Ekonomika jáne biýdjettik josparlaý basqarmasynyń basshysy Aijan Túgelbaeva 2025 jyly 18 naýryzda ótken Máslihat otyrysynda únemdelgen milliardtar qaida jumsalatynyn aityp berdi,- dep habarlaidy Dalanews.kz
Aijan Túgelbaeva ekonomikanyń oń ósimine sáikes aǵymdaǵy jylǵa jergilikti biýdjetke túsetin kirister boiynsha jospardy 42,2 mlrd teńgege – 966,3 mlrd teńgege deiin ulǵaitý jaǵyna qarai qaita qaraý usynylyp otyrǵanyn atap ótti. Onyń ishinde salyqtyq túsimder 32 milliard teńgege, al salyqtyq emes túsimder 10,2 milliard teńgege artady.
"2024 jylǵy biýdjettiń atqarylý qorytyndysy boiynsha bos qaldyqtardy 87,1 mlrd teńge mólsherinde qaita bólý usynylady. Ońtailandyrý boiynsha júrgizilip jatqan saiasat sheńberinde shyǵystar qaita qaralyp, biýdjette bekitilgen 20 mlrd teńge somasyna jekelegen is-sharalar qysqartyldy. Bul qarajatty qala damýynyń shuǵyl mindetterin sheshýge qosymsha baǵyttaý josparlanýda", - dedi ol.
Spikerdiń aitýynsha, birinshi kezekte áleýmettik salany qarjylandyrý máseleleri qaralyp jatyr. Osy maqsattarǵa qosymsha 27,2 mlrd teńge bólý josparlanýda. Onyń ishine mektepke deiingi jáne orta bilim berýdi qosymsha qarjylandyrý, ákimniń joǵary oqý oryndaryndaǵy granttary, 6 kolledjdi aǵymdaǵy jóndeý, toǵyz mektepke deiingi mekemelerdi jabdyqtaý jáne aǵymdaǵy jóndeý, sondai-aq alty mektep pen bes balabaqshany kúrdeli jóndeý kiredi.
Taǵy 2,5 mlrd teńge qarttar men múgedektigi bar adamdarǵa arnalǵan áleýmettik qyzmetterge, sondai-aq vedomstvolyq baǵynysty densaýlyq saqtaý mekemeleriniń materialdyq-tehnikalyq bazasyn nyǵaitýǵa qosymsha qarastyrylǵan.
Budan basqa, sport salasyndaǵy memlekettik tapsyrysty qarjylandyrýǵa, qurama komandalardy respýblikalyq jáne halyqaralyq jarystarǵa daiyndaýǵa jáne qatysýǵa 6 mlrd teńge qarastyrylǵan.
Jalpy Aijan Túgelbaevanyń aitýynsha, usynylǵan túzetilgen biýdjet jobasy qalanyń negizgi áleýmettik jáne infraqurylymdyq mindetterin sheshýge baǵyttalǵan.
