Astana ákimdigi Áliia Nazarbaevaǵa tiesili "Clean City NC" qoqys shyǵarý kompaniiasymen seriktes retinde áli de jumys istep keledi, dep habarlaidy Dalanews.kz.
Buǵan deiin QR Ekologiia jáne tabiǵi resýrstar ministri Erlan Nysanbaev jýrnalisterge bergen suqbatynda Nazarbaevaǵa tiesili kompaniialarmen kelisim-shart toqtaǵanyn kesip aitqan bolatyn. Alaida sońǵy málimetterge sáikes, bul aqparat shyndyqqa janaspaityn bolyp shyqty.
Astana ákimi Jeńis Qasymbektiń aitýynsha, "Clean City" UK-men bes jyl buryn jasalǵan kelisim sáýir aiynda aiaqtalady-mys.
"Bul kompaniiamen kelisim-shart merzimi aiaqtalady. Búginde kompaniia búkil qala boiynsha jumys istep tur. Onymen bes-alty jyl buryn kelisim-shart jasalǵan. Osy jyldyń sáýir aiynda qalany bes aýdanǵa bólip, konkýrs jariialaimyz. Sebebi turǵyndar sany eki esege artqan. Sáikesinshe qoqystar da kóbeigen", - dedi Qasymbek.
Budan bylai Astanada birneshe kompaniia qoqys shyǵaratyn bolady. Olarǵa qoiylatyn basty talap – arnaiy jabdyqtyń bolýy. Biraq Áliia Nazarbaevanyń kompaniiasy bul baiqaýda da jeńiske jetip, ákimdik merdigerleriniń biri bolýy múmkin.
Eske salaiyq, 2023 jyldyń kúz aiynda ekologiia jáne tabiǵi resýrstar ministri Erlan Nysanbaev eks – prezident Nursultan Nazarbaevtyń kishi qyzy Áliia Nazarbaevanyń kompaniiasy qoqys shyǵarýmen ainalyspaitynyn jetkizgen edi.
"Meniń aqparatym boiynsha, Áliia Nazarbaevanyń kompaniiasy búginde qoqys shyǵarýmen ainalyspaidy", - dep ministr Úkimettegi brifingte málimdeme jasaǵan bolatyn.
