استانا اكىمدىگى ءاليا نازاربايەۆاعا تيەسىلى "Clean City NC" قوقىس شىعارۋ كومپانياسىمەن سەرىكتەس رەتىندە ءالى دە جۇمىس ىستەپ كەلەدى، دەپ حابارلايدى Dalanews.kz.
بۇعان دەيىن ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ جۋرناليستەرگە بەرگەن سۇقباتىندا نازاربايەۆاعا تيەسىلى كومپانيالارمەن كەلىسىم-شارت توقتاعانىن كەسىپ ايتقان بولاتىن. الايدا سوڭعى مالىمەتتەرگە سايكەس، بۇل اقپارات شىندىققا جاناسپايتىن بولىپ شىقتى.
استانا اكىمى جەڭىس قاسىمبەكتىڭ ايتۋىنشا، "Clean City" ۇك-مەن بەس جىل بۇرىن جاسالعان كەلىسىم ءساۋىر ايىندا اياقتالادى-مىس.
"بۇل كومپانيامەن كەلىسىم-شارت مەرزىمى اياقتالادى. بۇگىندە كومپانيا بۇكىل قالا بويىنشا جۇمىس ىستەپ تۇر. ونىمەن بەس-التى جىل بۇرىن كەلىسىم-شارت جاسالعان. وسى جىلدىڭ ءساۋىر ايىندا قالانى بەس اۋدانعا ءبولىپ، كونكۋرس جاريالايمىز. سەبەبى تۇرعىندار سانى ەكى ەسەگە ارتقان. سايكەسىنشە قوقىستار دا كوبەيگەن"، - دەدى قاسىمبەك.
بۇدان بىلاي استانادا بىرنەشە كومپانيا قوقىس شىعاراتىن بولادى. ولارعا قويىلاتىن باستى تالاپ – ارنايى جابدىقتىڭ بولۋى. ءبىراق ءاليا نازاربايەۆانىڭ كومپانياسى بۇل بايقاۋدا دا جەڭىسكە جەتىپ، اكىمدىك مەردىگەرلەرىنىڭ ءبىرى بولۋى مۇمكىن.
ەسكە سالايىق، 2023 جىلدىڭ كۇز ايىندا ەكولوگيا جانە تابيعي رەسۋرستار ءمينيسترى ەرلان نىسانبايەۆ ەكس – پرەزيدەنت نۇرسۇلتان نازاربايەۆتىڭ كىشى قىزى ءاليا نازاربايەۆانىڭ كومپانياسى قوقىس شىعارۋمەن اينالىسپايتىنىن جەتكىزگەن ەدى.
"مەنىڭ اقپاراتىم بويىنشا، ءاليا نازاربايەۆانىڭ كومپانياسى بۇگىندە قوقىس شىعارۋمەن اينالىسپايدى"، - دەپ مينيستر ۇكىمەتتەگى بريفينگتە مالىمدەمە جاساعان بولاتىن.
