Aldymen qonaqtar Otyrar móltek aýdanynda bolyp, ákimshilik-iskerlik ortalyqta boı kóterip jatqan nysandardy aralap kórdi. Onda qazirgi tańda 26 kópqabatty turǵyn úıdiń qurylys jumystary júrgizilýde. 1536 páterdiń 1200-i (20 turǵyn úı) arendalyq úıler bolsa, qalǵan 6 turǵyn úı, ıaǵnı 336 páter kredıttik baspanalar qatarynda.
Bıyl qyrkúıek aıynda irgetasy qalanyp, memlekettik búdjet esebinen salynyp jatqan 60 páterli 20 turǵyn úıdiń 11-i (660 páter) 2019 jyldyń sáýir aıynda tapsyrylady. Al, 9 turǵyn úı (540 páter) keler jyldyń qarasha aıyna el ıgiligine berilmek. Kredıttik kópqabatty 6 turǵyn úıdiń (336 páter) qurylys jumystary 2019 jyldyń maýsym aıynda aıaqtalyp, paıdalanylýǵa tapsyrylady.
Sondaı-aq, onda memlekettik-jekeshelik áriptestik aıasynda 280 oryndyq balabaqsha paıdalanýǵa berilip, 900 oryndyq mektep aldaǵy jyly oqý jyly qarsańynda ashylatyn bolady. Odan bólek, iskerlik ortalyqta ákimshilik ǵımaraty, basqarmalar jáne departamentter úıleri jáne 5 juldyzdy «Rıksos» qonaq úıiniń qurylysy bastalyp ketti.
QR Premer-Mınıstriniń birinshi orynbasary bastaǵan jumysshy topqa Túrkistan qalasynyń ákimi Álipbek Óserbaev oblys ortalyǵyn ınfraqurylymmen qamtý josparymen tanystyrdy.
Túrkistan qalasynyń ınjenerlik ınfraqurylymy qazirgi tańda salynyp jatqan ákimshilik-iskerlik ortalyǵynyń 270 gektar jáne rýhanı-mádenı ortalyǵynyń 98 gektar aýmaǵyn qamtamasyz etýge múmkindik beredi. 2018 jyly Túrkistan qalasynda 20 myń abonent gazben qamtamasyz etilip, qamtý deńgeıi 58 paıyzǵa jetetin bolady.
Sondaı-aq, astanalyq delegasıa «Áziret-sultan» memlekettik tarıhı-mádenı qoryǵyna aıaldady. Onda Qoja Ahmet Iasaýı kesenesiniń mańynan salynatyn tarıhı arhıtektýralyq jobalardyń nobaıymen tanysty. Atalǵan aýmaqtaǵy 98 gektar jerge rýhanı jáne mádenı ortalyq salynatyn bolady.
