Bokstan 2023 jylǵy álem chempiony, Qazaqstan ulttyq quramasynyń burynǵy kapitany Aslanbek Shymbergenov sporttyq mansabyn aiaqtaitynyn málimdedi, dep habarlaidy dalanews.kz.
Bul týraly ol Sportbugin.kz tilshisine bergen suhbatynda aitqan.
Shymbergenovtiń sózinshe, sharshy alańǵa qaita oralý jospary bolǵan. Ol tipti jattyǵýǵa kirisip kórgenimen, keiin mansabyn jalǵastyrmaý týraly sheshim qabyldaǵan.
"Biraq, qolym júrmedi. Sondyqtan, kásibi mansabymdy aiaqtaimyn dep sheshtim. Búginde Jambyl oblysyndaǵy kásibi boks klýbynda basshynyń orynbasary bolyp jumys istep júrmin", – dedi ol.
Aslanbek Shymbergenov 1993 jylǵy 9 qazanda Jambyl oblysynda dúniege kelgen. Ol uzaq jyldar boiy Qazaqstan ulttyq quramasynyń sapynda óner kórsetti.
Sportshy – Qazaqstannyń eki dúrkin chempiony, 2022 jylǵy Aziia chempiony jáne 2023 jylǵy álem chempiony. Sondai-aq ol 2019 jyly áskeriler arasyndaǵy álem chempionatynda top jarǵan. Shymbergenov 2018 jylǵy Aziia oiyndarynda kúmis, 2023 jylǵy Aziia oiyndarynda qola júlde ielendi. Budan bólek, ol 2024 jylǵy Parij Olimpiadasyna qatysty.
