Qazaqstanda 1 qańtardan bastap barlyq kúshtik qurylymdardyń áskeri qyzmetkerleri men olardyń otbasy músheleri jylyna bir ret el aýmaǵynda jolaýshylar poiyzymen tegin qatynaý quqyǵyna ie bolady, dep habarlaidy Dala News.
Bul bastama IIM Ulttyq ulanynyń Bas qolbasshylyǵynda ótken arnaiy jiynda tanystyryldy. Kezdesý barysynda jeke quramǵa jańa áleýmettik jeńildiktiń mazmuny túsindirilip, ony óńirlerde júzege asyrý tetikteri talqylandy.
Jiynda belgili bolǵandai, jeńildik tek Qazaqstan ishindegi jolaýshylar poiyzdaryna ǵana qatysty. Al tegin jol júrýmen bailanysty shyǵyndardy «Qazaqstan temir joly» ulttyq kompaniiasy óteidi.
«Jolaýshylao tasymaly» AQ ekonomika jáne tasymal esebi departamentiniń bas menedjeri Ainur Bazarbaeva bul bastama áskeri qyzmetkerlerdiń áleýmettik qorǵalý deńgeiin arttyryp, otbasymen birge saparǵa shyǵýyna múmkindik beretinin atap ótti.
Is-sharaǵa qatysqan «Qazaqstan temir joly» UK» AQ tariftik saiasat departamentiniń direktory Dias Túsipbekov áskeri qyzmetkerlerdiń suraqtaryna jaýap berip, jeńildikti iske asyrýdyń tehnikalyq jáne uiymdastyrýshylyq qyrlaryna toqtaldy.
Ulttyq ulan Bas qolbasshysynyń tárbie jáne áleýmettik-quqyqtyq jumystar jónindegi orynbasary Qairat Úmbetov bul sharanyń mańyzyn atap ótip, onyń naqty ári ádil júzege asýyna basa mán berý kerektigin aitty. Onyń sózinshe, bul bastama áskeri qyzmetkerlerge demalysyn aldyn ala josparlaýǵa, otbasy biýdjetine túsetin salmaqty azaitýǵa múmkindik beredi.
