Qarýly kúshterde biryńǵai Ashyq esik kúni ótti. Onyń aiasynda elimizdiń ár óńirindegi 50-den astam áskeri bólim kelýshilerge esigin ashty. Is-sharaǵa 15 myńnan astam adam qatysty. Olardyń qatarynda mektep oqýshylary, stýdentter, pedagogter, sondai-aq merzimdi áskeri qyzmetshilerdiń ata-analary men jaqyndary bar, dep habarlaidy Dalanews.kz
Aktsiia Qarýly kúshterdiń barlyq túrleri men ásker tekterin qamtydy: Qurlyq áskerleri, Áýe qorǵanysy kúshteri, Áskeri-teńiz kúshteri, Desanttyq-shabýyldaý áskerleri jáne Arnaiy operatsiialar kúshteri. Qonaqtar armiia tynys-tirshiligin ishinen kórip, áskeri qyzmet týraly jan-jaqty túsinik aldy.
– Biz áskeri qyzmettiń ótý barysyn barynsha ashyq kórsetemiz. Bul jastar úshin de, ata-analar úshin de mańyzdy. Armiia – minez, tártip pen jaýapkershilik qalyptasatyn ómir mektebi, – dedi Tárbie jáne ideologiialyq jumystar departamentiniń bastyǵy ádilet polkovnigi Tileýhan Basqojaev.
Baǵdarlamanyń praktikalyq bóligi erekshe qyzyǵýshylyq týdyrdy. Mektep oqýshylary men stýdentter áskeri qyzmetshilerdiń jattyǵýlaryn tamashalap, áskeri tehnikamen jáne túrli bólimshelerdiń jumysymen tanysty. Sonymen qatar olar ózderin bolashaq Otan qorǵaýshysy retinde synap kórdi.
Elordadaǵy №13 mekteptiń 9-synyp oqýshysy Daiana Gýliaeva alǵan áserimen bólisti:
– Buǵan deiin mundai tehnikany tek filmder men jańalyqtardan kóretinbiz. Búgin ony óz kózimizben kórip, tipti qolmen ustaýǵa múmkindik aldyq. Ásirese zamanaýi drondar men brondy tehnika erekshe áser qaldyrdy. Bul – armiiamyzǵa degen maqtanysh sezimin oiatatyn mańyzdy sát.
Baǵdarlama saptyq alańdaǵy kórneki qoiylymdarmen aiaqtaldy. Áskeri qyzmetshiler saptyq daiyndyq elementterin, qoian-qoltyq urys tásilderin jáne taktikalyq is-qimyl epizodtaryn kórsetti.
Is-shara sońynda qonaqtarǵa sarbaz botqasy usynyldy. Ashyq esik kúnin turaqty túrde ótkizý qoǵamnyń armiiaǵa degen senimin nyǵaityp, jastardyń áskeri qyzmetke qyzyǵýshylyǵyn arttyrýǵa jáne onyń bedelin kóterýge yqpal etedi.
