Májilis depýtaty, AMANAT partiiasy fraktsiiasynyń jetekshisi Elnur Beisenbaev Biz Birgemiz Qazaqstan qaiyrymdylyq qorynyń basshysy Perizat Qairattyń ustalýyna qatysty pikir bildirdi, dep habarlaidy Dalanews.kz.
“Tergeýdiń aiaqtalǵanyn kútýimiz qajet. Mundai isterde asyǵys sheshim shyǵarýǵa bolmaidy. Árbir qaiyrymdylyq qorynyń basshysy halyqtan túsken ár teńge úshin jaýapty”, – dedi depýtat.
Depýtat “Biz Birgemiz” qory men AMANAT partiiasynyń bailanysy bar degen aqparatty joqqa shyǵardy. Aitýynsha, esimi atalǵan azamattar qorda úsh jyl buryn jas volonter retinde qyzmet atqarǵan.
“Qordaǵy qamqorshylar jas volonter boldy. Bul úsh jyl buryn bolǵan oqiǵa. Búginde olardyń keibiri belgili bir jetistikterge jetip, laýazymdarǵa ie boldy, al keibiri partiiaǵa múshe bolyp kirdi. Biraq qordyń partiiaǵa resmi bailanysy joq. Pandemiia kezinde biz 600 myń azamatqa kómektestik”, – dedi Beisenbaev.
Sonymen qatar depýtat qaiyrymdylyq qorlaryna tosqaýyl qoiýdyń qajeti joq ekenin de atap ótti.
“Mundai qorlardyń jumysy ashyq ári ádil bolýy tiis. Ókinishke qarai, halyq senimin teris paidalanatyndar kezdesedi. Bul tek bir qorǵa qatysty emes, jalpy qoǵamdaǵy másele. Sondyqtan barlyǵyn tekserip, retke keltirý qajet”, – dedi ol.
Beisenbaev qaiyrymdylyq qorlaryna únemi kómek kórsetetinin, alaida “Biz Birgemiz” qoryna qarjylai qoldaý kórsetpegenin jetkizdi.
“Ózim qaiyrymdylyq qorlaryna kómektesip turamyn. Biraq «Biz birgemiz» qoryna aqsha jibermedim. Biz sý tasqyny kezinde zardap shekkenderge partiianyń atynan kómektestik”, – dep qorytyndylady depýtat.
Aita keteiik, QMA eriktiler qozǵalysynyń belsendisi jáne BizBirgemizQazaqstan qoǵamdyq qaiyrymdylyq qorynyń quryltaishysy Perizat Qairatqa qatysty tergeý júrgizilip jatyr.
Ol kóktemgi sý tasqynynan zardap shekken azamattarǵa kómektesý úshin jinalǵan 1,5 mlrd teńgeden astam qarajatty jymqyrdy dep kúdikke ilindi.
Qaiyrymdylyqtyń negizgi bóligi qymbat sán buiymdary men jyljymaityn múlikti satyp alý maqsatyna paidalanyldy.
Biyl kóktemde ol elordadaǵy avtosalondarda 88 mln teńgege "Mercedes-Benz S450", 80 mln teńgege "Lexus LX-600" jáne 39 mln teńgege "Haval" avtokólikterin satyp aldy.
Osy kezeńde ol jalpy somasy 600 mln teńgeni quraityn elordanyń premiým sanattaǵy "Akbulak Riviera", "Highvill Ishim Gold", "Kók Jailaý" TK (turaq oryndaryn qosa alǵanda), sondai-aq "Vela Village" kottedj qalashyǵynda jyljymaityn múlik nysandaryn satyp aldy.
Sonymen qatar, qazaqstandyqtardyń qaiyrymdylyqqa jibergen qarajat esebinen Perizat Q. Dýbai, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» siiaqty bes juldyzdy qonaq úilerde demalǵan.
Bul elderde ol "Cartier" jáne "Louis Vuitton" siiaqty brendterdiń qymbat aksessýarlary men zergerlik buiymdardy satyp alyp, feshenebeldi meiramhanalarǵa baryp, iahtalardy jaldaǵan.
Qylmystyq shemany júzege asyrý úshin dostary men týystaryna 8% syiaqy berip, qordyń aqshasy qolma-qol aqshaǵa ainaldyryp otyrǵan.
Osylaisha, Perizat Q. óziniń zańsyz áreketterimen eriktiler qozǵalysynyń bedeline nuqsan keltirip, onyń ashyqtyq pen adaldyq printsipterine kúmán keltirdi jáne halyqtyń senip tapsyrǵan qarajatyn talan-tarajǵa salǵan.
16 qarasha kúni Qarjy monitoringi agenttigi Eriktiler qozǵalysynyń belsendisi Perizat Qairatqa qatysty tergeý faktisi boiynsha qosymsha aqparatty jariialady. Agenttik Perizat Qairattyń Palestinaǵa dep aqsha jinap, 200 mln teńgeden asa qarajatty jymqyrǵanyn rastady.
