Baqyt Qaiyrbekov atalǵan derekti filmdi osydan 5 jyl buryn túsirgen. Film akterdiń 80 jyldyq mereitoiyna arnalady. Asanáli Áshimov rejisser jumysyna joǵary baǵa berdi.
– Men búgin bul filmdi birinshi ret kórip otyrmyn. Baqyt Qaiyrbekov qazaqstandyqtar arasynda tanylǵan adam. Onyń bul eńbegin joǵary baǵalaimyn, maǵan qatty unady. Men bul filmdi jaqsy jumys dep esepteimin. Baqyttyń ózine de jumys qorytyndysy unap otyr, – dedi Áshimov.
Baqyt Qaiyrbekovtiń derekti filmi halyqtyń súiiktisine ainalǵan ártistiń ómir jolyna arnalǵan. Onda sheberdiń belesterdi baǵyndyrý jolyndaǵy qajyrly eńbegi kórsetilgen. Shynymen de, Asanáli Áshimovke bul shyńnan kóriný úshin qansha tabandylyq pen qairat kórsetý qajet boldy. Óitkeni, ol bul joldy tańdarda onyń aǵaiyndary basynda qarsylyq ta tanytqan.
– Basynda sheshem diplom alyp, oqý oqysań boldy degen. Sosyn, men óz tańdaýymdy jasap edim, týǵan aǵam ondai kásipti estigisi de kelmeitinin aitty. Ol muny uiat dep esepteidi eken. Tuqymymyzda ártis bolmaǵan deidi. Keiin men KSR Halyq ártisi degen ataq alǵanymda tańdaýymnyń durys bolǵanyn aityp, maqtan tutty, – dep eske aldy mereitoi iesi.
Filmde aqsaqaldyń ómirde orny tolmas qazalarǵa dýshar bolǵany da aitylady. Aldymen anasyn, keiin jan jaryn, sosyn, bir jylda eki ulyn jer qoinyna tapsyrǵanyn ózi aityp beredi. Biraq, búgingi jary men qazir úshinshi synypqa baratyn uly ómirine nár bergen.
– Men turmysqa kesh shyqtym. Ózime laiyqty jar izdedim. Asanáli meniń taǵdyrym ekenin túsindim. Ol bizge aýrýhanaǵa túskende men onyń kózinen aýyrtpashylyqty kórdim. Mundai adam jylamaýy kerek dep oiladym. Ol maǵan ómirdegi eń basty syilyq ulymdy syilady, – dedi akterdiń jary Baǵdat Áshimova.
Baqyt Qaiyrbekovtiń filmi metr týraly jalǵyz eńbek qana emes, qazirgi ýaqytta «Qazaqfilm» ártistiń ómiri týraly túsirip jatqan týyndyny aiaqtaýǵa jaqyn. Ol film EKSPO aiasynda kórsetilmek. Halyq ártisiniń 80 jyldyń mereitoiy Astanada atalyp ótiledi.
