Almaty oblysy Talǵar aýdanynda qaza tapqan 24 jastaǵy Janasyl Sársenbaidyń týystary marqumnyń artynda bir jasar eki qyzy qalǵanyn aitty, dep habarlaidy KTK telearnasynyń saity.
Janasyl Sársenbaidyń jaqyndarynyń sózinshe, kúdiktiler buǵan deiin de aýyl turǵyndaryna túngi ýaqytta tiisip, mazalaryn alǵan.
Marqumnyń otbasy úsh jigit Janasyldy ákesiniń qabiri ornalasqan zirattan bastap ańdyp kelgenin aitady. Keiin úiiniń mańynda, inisiniń kózinshe oǵan pyshaq jaraqatyn salǵan. Qaza tapqan jigittiń anasy kinálilerge qatań jaza berýdi talap etip otyr.
"Balam júgirip kelip: "Aǵamdy pyshaqtap ketti" dedi. Men kiinip, aýlaǵa shyqtym. Janasyldy kórdim. Ol tizerlep otyr eken. Qushaqtap aldym. Onyń aýyr dem alyp jatqanyn estidim. Biz ony aýrýhanaǵa apardyq. Biraq onda eshkim bolmady. Sosyn Jetigendegi aýrýhanaǵa bardyq. Dárigerler kesh bolyp ketkenin aitty", – dedi marqumnyń anasy Almagúl Nurǵyzat.
Qylmysqa kýá bolǵan Janasyldyń inisi óz ómirine qaýiptenetinin aityp, júzin kórsetýden bas tartqan.
Onyń aitýynsha, úsh adam mingen kólik aǵaly-inili ekeýin ákesiniń qabirine barǵan zirattan bastap úiine deiin qýyp kelgen.
Jastar aldymen olardyń jolyn bógegen. Janasyl aýyldastarynan joldy bosatýdy surap, belgi bergen. Biraq olar kólikti alyp tastamaǵan. Sol kezde Janasyl olardy joǵary jyldamdyqpen ainalyp ótpek bolǵan. Boljam boiynsha, kúdiktilerdi osy jaǵdai ashýlandyrǵan.
"Biz olardy joǵary jyldamdyqpen ainalyp óttik. Biraq olar artymyzdan qýyp, signal berip keldi. Biz mán bermedik. Toqtamai úige deiin jettik. Kólikti qoidyq. Olar da toqtap, kólikten tústi. Biz olardyń qolynda pyshaq bar dep oilamadyq. Bireýi kelip, úndemesten aǵama eki ret pyshaq suqty. Sosyn olar birden kólikke otyryp, qashyp ketti. Olar ózderin durys ustamady. Mas kúide boldy", – dedi marqumnyń inisi.
Janasyl Sársenbaidyń otbasynyń aitýynsha, marqumnyń artynda bir jasar eki qyzy qaldy.
