"ArselorMittaldyń" burynǵy qyzmetkeri sottasyp júrip kompaniiadan úsh kólik óndirip alǵan
72 jastaǵy metallýrg Viktor Kýrin birneshe ýaqyt boiy kompaniiamen sottasyp, burynǵy jumys berýshisinen avtokólik berýdi talap etken. 2004 jyly er adam jumys kezinde jaraqat alyp, úshinshi toptaǵy múgedek bolyp qalǵan. Kýrin Azamattyq kodekste kásiporyn oǵan arnaiy avtokólik berýge mindetti ekeni jazylǵan bapty taýyp alǵan. Nátijesinde er adam kompaniiadan alǵashqy kóligin 2006 jyly alǵan. Al segiz jyldan keiin kompaniianyń burynǵy qyzmetkeri qaitadan basqa kólik satyp alýdy talap etken.
2014 jyly dárigerlik-konsýltatsiialyq komissiianyń qorytyndysyna sáikes jáne avtokóliktiń qyzmet etý merziminiń aiaqtalǵanyn eskere otyryp, Kýrinniń jazbasha ótinishi boiynsha avtomatty berilis qoraby bar jańa Lada Granta kóligi satyp alynǵan.
Al toǵyz jyldan keiin Kýrin AMT-den qaitadan kólik talap etken. Kompaniia bas tartqannan keiin er adam sotqa júgingen. Onyń sózinshe, eski kólik jaramsyz bolyp qalǵan, al jóndeý jumystaryna kóp qarajat qajet bolǵan.
"2014 jyly satyp alynǵan Lada Granta avtokóliginiń jaramdylyq merzimi 8 jyl nemese 120 000 shaqyrym júris. Avtokólik – qaýipti quraldardyń biri. Daiyndaýshy zaýyt belgilegen qyzmet merziminen assa ony paidalaný qaýipti bolýyna bailanysty jaýapkerge jańa kólik satyp alýdy mindetteýdi suraimyn", - delingen qujatta.
Alaida kompaniia zańgerleri birinshi instantsiiadaǵy sotta kásiporyn burynǵy qyzmetkerge jańa avtokólik satyp alýǵa mindetti emes ekenin dáleldegen.
Eks-qyzmetker munymen toqtap qalmaǵan. Ol birinshi instantsiia sheshimine Joǵarǵy sotqa baryp qaitadan aryz jazǵan.
Joǵarǵy sottyń azamattyq ister jónindegi sot alqasynyń tóraǵasy Nurserik Sháripov múgedektigi bar adamnyń talap-aryzyn tolyq kólemde qanaǵattandyrý týraly sheshim qabyldanǵanyn málimdedi. Jumys berýshi burynǵy qyzmetkerge qyzmet etý merzimin ótegen eski mashinanyń ornyna jańa kólik satyp alýy mindetteldi.
Sot protsesteri kezinde AMT advokattary buǵan deiin berilgen kólikterdi burynǵy jumysshy satyp jibergenin aitqan. Biraq sýdia bul aqparattyń negizsiz ekenin aitqan, sebebi kompaniia buǵan deiin bul týraly málimdemegen.
Sýret: Egemen Qazaqstan
