72 جاستاعى مەتاللۋرگ ۆيكتور كۋرين بىرنەشە ۋاقىت بويى كومپانيامەن سوتتاسىپ، بۇرىنعى جۇمىس بەرۋشىسىنەن اۆتوكولىك بەرۋدى تالاپ ەتكەن. 2004 جىلى ەر ادام جۇمىس كەزىندە جاراقات الىپ، ءۇشىنشى توپتاعى مۇگەدەك بولىپ قالعان. كۋرين ازاماتتىق كودەكستە كاسىپورىن وعان ارنايى اۆتوكولىك بەرۋگە مىندەتتى ەكەنى جازىلعان باپتى تاۋىپ العان. ناتيجەسىندە ەر ادام كومپانيادان العاشقى كولىگىن 2006 جىلى العان. ال سەگىز جىلدان كەيىن كومپانيانىڭ بۇرىنعى قىزمەتكەرى قايتادان باسقا كولىك ساتىپ الۋدى تالاپ ەتكەن.
2014 جىلى دارىگەرلىك-كونسۋلتاسيالىق كوميسسيانىڭ قورىتىندىسىنا سايكەس جانە اۆتوكولىكتىڭ قىزمەت ەتۋ مەرزىمىنىڭ اياقتالعانىن ەسكەرە وتىرىپ، كۋريننىڭ جازباشا ءوتىنىشى بويىنشا اۆتوماتتى بەرىلىس قورابى بار جاڭا Lada Granta كولىگى ساتىپ الىنعان.
ال توعىز جىلدان كەيىن كۋرين امت-دەن قايتادان كولىك تالاپ ەتكەن. كومپانيا باس تارتقاننان كەيىن ەر ادام سوتقا جۇگىنگەن. ونىڭ سوزىنشە، ەسكى كولىك جارامسىز بولىپ قالعان، ال جوندەۋ جۇمىستارىنا كوپ قاراجات قاجەت بولعان.
"2014 جىلى ساتىپ الىنعان Lada Granta اۆتوكولىگىنىڭ جارامدىلىق مەرزىمى 8 جىل نەمەسە 120 000 شاقىرىم ءجۇرىس. اۆتوكولىك – ءقاۋىپتى قۇرالداردىڭ ءبىرى. دايىنداۋشى زاۋىت بەلگىلەگەن قىزمەت مەرزىمىنەن اسسا ونى پايدالانۋ ءقاۋىپتى بولۋىنا بايلانىستى جاۋاپكەرگە جاڭا كولىك ساتىپ الۋدى مىندەتتەۋدى سۇرايمىن"، - دەلىنگەن قۇجاتتا.
الايدا كومپانيا زاڭگەرلەرى ءبىرىنشى ينستانسياداعى سوتتا كاسىپورىن بۇرىنعى قىزمەتكەرگە جاڭا اۆتوكولىك ساتىپ الۋعا مىندەتتى ەمەس ەكەنىن دالەلدەگەن.
ەكس-قىزمەتكەر مۇنىمەن توقتاپ قالماعان. ول ءبىرىنشى ينستانسيا شەشىمىنە جوعارعى سوتقا بارىپ قايتادان ارىز جازعان.
جوعارعى سوتتىڭ ازاماتتىق ىستەر جونىندەگى سوت القاسىنىڭ ءتوراعاسى نۇرسەرىك ءشارىپوۆ مۇگەدەكتىگى بار ادامنىڭ تالاپ-ارىزىن تولىق كولەمدە قاناعاتتاندىرۋ تۋرالى شەشىم قابىلدانعانىن مالىمدەدى. جۇمىس بەرۋشى بۇرىنعى قىزمەتكەرگە قىزمەت ەتۋ مەرزىمىن وتەگەن ەسكى ماشينانىڭ ورنىنا جاڭا كولىك ساتىپ الۋى مىندەتتەلدى.
سوت پروسەستەرى كەزىندە امت ادۆوكاتتارى بۇعان دەيىن بەرىلگەن كولىكتەردى بۇرىنعى جۇمىسشى ساتىپ جىبەرگەنىن ايتقان. ءبىراق سۋديا بۇل اقپاراتتىڭ نەگىزسىز ەكەنىن ايتقان، سەبەبى كومپانيا بۇعان دەيىن بۇل تۋرالى مالىمدەمەگەن.
سۋرەت: ەگەمەن قازاقستان
