Qazaqstanda 2025 jyldyń qorytyndysy boiynsha ziiandy eńbek jaǵdaiynda uzaq jyldar qyzmet etken 6 289 azamatqa arnaýly áleýmettik tólem berildi. Bul tólem túrin alý úshin jalpy 6 675 adam ótinish tapsyrǵan, dep habarlaidy Dalanews.kz.
Eki qarjylandyrý kózinen - respýblikalyq biýdjet pen Biryńǵai jinaqtaýshy zeinetaqy qorynan tólenetin arnaýly áleýmettik tólemge 590 azamat júginip, olardyń 581-ine tólem taǵaiyndalǵan.
Al tórt kózden qarjylandyrylatyn (respýblikalyq biýdjet, BJZQ, jumys berýshi jáne ómirdi saqtandyrý uiymy esebinen) tólemdi alý úshin 6 085 adam ótinish berip, nátijesinde 5 708 azamatqa taǵaiyndaldy.
Sonymen qatar 196 adam saqtandyrý kompaniiasymen zeinetkerlik annýitet shartynyń rásimdelýin kútýde. 103 azamat SMS-habarlamaǵa jaýap bermegen. Al belgilengen talaptardyń oryndalmaýyna bailanysty 87 ótinish iesine arnaýly áleýmettik tólem taǵaiyndalmady.
Óńirler boiynsha eń kóp ótinish Qaraǵandy, Pavlodar jáne Shyǵys Qazaqstan oblystarynan túsken. Atap aitqanda:
- Qaraǵandy oblysynda - 2 kózden tólemge 88 adam, 4 kózden tólemge 922 adam;
- Pavlodar oblysynda - 2 kózden 37 adam, 4 kózden 774 adam;
- Shyǵys Qazaqstan oblysynda - 2 kózden 49 adam, 4 kózden 492 adam ótinish bildirgen.
Eske salaiyq, 2024 jyldyń 1 qańtarynan bastap elimizde ziiandy eńbek jaǵdaiynda uzaq ýaqyt jumys istegen azamattarǵa arnalǵan arnaýly áleýmettik tólem júiesi iske qosylǵan.
Bul tólemdi alý úshin azamattyń 55 jasqa tolýy jáne Biryńǵai jinaqtaýshy zeinetaqy qorynda keminde 7 jyl kásibi zeinetaqy jarnalarynyń bolýy mindetti. Arnaýly áleýmettik tólem zeinetkerlik jasqa deiin tólenedi.
Mańyzdy sharttardyń biri tólem alýshynyń ziiandy eńbek jaǵdailaryndaǵy jumysty toqtatýy. Bul rette qyzmetkerler jeńil jumysqa aýysyp, jalaqysy men tólemdi qatar ala alady nemese tolyq demalysqa shyǵyp, zeinetke shyqqanǵa deiin arnaýly áleýmettik tólemmen qamtylady.
Eńbek jáne halyqty áleýmettik qorǵaý ministrliginiń málimetinshe, Áleýmettik kodekske sáikes, ziiandy eńbek jaǵdailaryna jatatyn kásipter men qyzmet túrleriniń tizimi bekitilgen. Atalǵan tizimge 2,3 myńnan astam mamandyq engen.
Osylaisha, arnaýly áleýmettik tólemdi ekonomikanyń 17 salasynda, onyń ishinde taý-ken óndirý, óńdeý ónerkásibi jáne basqa da salalarda eńbek etetin qazaqstandyqtar ala alady.
