قازاقستاندا 2025 جىلدىڭ قورىتىندىسى بويىنشا زياندى ەڭبەك جاعدايىندا ۇزاق جىلدار قىزمەت ەتكەن 6 289 ازاماتقا ارناۋلى الەۋمەتتىك تولەم بەرىلدى. بۇل تولەم ءتۇرىن الۋ ءۇشىن جالپى 6 675 ادام ءوتىنىش تاپسىرعان، دەپ حابارلايدى Dalanews.kz.
ەكى قارجىلاندىرۋ كوزىنەن - رەسپۋبليكالىق بيۋدجەت پەن ءبىرىڭعاي جيناقتاۋشى زەينەتاقى قورىنان تولەنەتىن ارناۋلى الەۋمەتتىك تولەمگە 590 ازامات جۇگىنىپ، ولاردىڭ 581-ىنە تولەم تاعايىندالعان.
ال ءتورت كوزدەن قارجىلاندىرىلاتىن (رەسپۋبليكالىق بيۋدجەت، بجزق، جۇمىس بەرۋشى جانە ءومىردى ساقتاندىرۋ ۇيىمى ەسەبىنەن) تولەمدى الۋ ءۇشىن 6 085 ادام ءوتىنىش بەرىپ، ناتيجەسىندە 5 708 ازاماتقا تاعايىندالدى.
سونىمەن قاتار 196 ادام ساقتاندىرۋ كومپانياسىمەن زەينەتكەرلىك اننۋيتەت شارتىنىڭ راسىمدەلۋىن كۇتۋدە. 103 ازامات سمس-حابارلاماعا جاۋاپ بەرمەگەن. ال بەلگىلەنگەن تالاپتاردىڭ ورىندالماۋىنا بايلانىستى 87 ءوتىنىش يەسىنە ارناۋلى الەۋمەتتىك تولەم تاعايىندالمادى.
وڭىرلەر بويىنشا ەڭ كوپ ءوتىنىش قاراعاندى، پاۆلودار جانە شىعىس قازاقستان وبلىستارىنان تۇسكەن. اتاپ ايتقاندا:
- قاراعاندى وبلىسىندا - 2 كوزدەن تولەمگە 88 ادام، 4 كوزدەن تولەمگە 922 ادام؛
- پاۆلودار وبلىسىندا - 2 كوزدەن 37 ادام، 4 كوزدەن 774 ادام؛
- شىعىس قازاقستان وبلىسىندا - 2 كوزدەن 49 ادام، 4 كوزدەن 492 ادام ءوتىنىش بىلدىرگەن.
ەسكە سالايىق، 2024 جىلدىڭ 1 قاڭتارىنان باستاپ ەلىمىزدە زياندى ەڭبەك جاعدايىندا ۇزاق ۋاقىت جۇمىس ىستەگەن ازاماتتارعا ارنالعان ارناۋلى الەۋمەتتىك تولەم جۇيەسى ىسكە قوسىلعان.
بۇل تولەمدى الۋ ءۇشىن ازاماتتىڭ 55 جاسقا تولۋى جانە ءبىرىڭعاي جيناقتاۋشى زەينەتاقى قورىندا كەمىندە 7 جىل كاسىبي زەينەتاقى جارنالارىنىڭ بولۋى مىندەتتى. ارناۋلى الەۋمەتتىك تولەم زەينەتكەرلىك جاسقا دەيىن تولەنەدى.
ماڭىزدى شارتتاردىڭ ءبىرى تولەم الۋشىنىڭ زياندى ەڭبەك جاعدايلارىنداعى جۇمىستى توقتاتۋى. بۇل رەتتە قىزمەتكەرلەر جەڭىل جۇمىسقا اۋىسىپ، جالاقىسى مەن تولەمدى قاتار الا الادى نەمەسە تولىق دەمالىسقا شىعىپ، زەينەتكە شىققانعا دەيىن ارناۋلى الەۋمەتتىك تولەممەن قامتىلادى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، الەۋمەتتىك كودەكسكە سايكەس، زياندى ەڭبەك جاعدايلارىنا جاتاتىن كاسىپتەر مەن قىزمەت تۇرلەرىنىڭ ءتىزىمى بەكىتىلگەن. اتالعان تىزىمگە 2،3 مىڭنان استام ماماندىق ەنگەن.
وسىلايشا، ارناۋلى الەۋمەتتىك تولەمدى ەكونوميكانىڭ 17 سالاسىندا، ونىڭ ىشىندە تاۋ-كەن ءوندىرۋ، وڭدەۋ ونەركاسىبى جانە باسقا دا سالالاردا ەڭبەك ەتەتىن قازاقستاندىقتار الا الادى.
