Armeniia 28 qarashada ótetin Ujymdyq qaýipsizdik týraly shart uiymynyń (UQShU) sammitine qatyspaityn boldy, dep habarlaidy Dalanews.kz.
Bul týraly eldiń syrtqy ister ministri Ararat Mirzoian málimdedi.
"Armeniia UQShU syrtqy ister ministrleri keńesiniń, qorǵanys ministrleri keńesiniń jáne qaýipsizdik keńesi hatshylary komitetiniń otyrystaryna qatyspaidy",—dedi ol.
Atalǵan aqparatty Reseidiń UQShU janyndaǵy turaqty ókili Viktor Vasilev RIA Novosti agenttigine rastady.
"Armeniialyq áriptester bul is-sharaǵa jeke qatysýdan bas tartty. Sonymen qatar olar bekitilýi tiis barlyq qujattyń shekteýli formatta qabyldanýyna qarsy emes", — dep túsindirdi ókil.
Aita keteiik, UQShU elderi ministrleriniń birlesken otyrysy 28 qarashada Astanada ótedi.
Qazan aiynyń sońynda Armeniianyń premer-ministri Araik Arýtiýnian Armeniia men Ázirbaijan arasyndaǵy beibit kelisimniń qalǵan tarmaqtaryn kelisýge bolatynyn aitty. Onyń sózinshe, Armeniia premer-ministri Nikol Pashinian men Ázirbaijan prezidenti Ilham Áliev arasyndaǵy bailanystar bul baǵytta paidaly bolyp otyr.
Eske salaiyq, 2024 jyldyń aqpanynda Armeniia premer-ministri Nikol Pashinian Erevannyń UQShU-ǵa qatysýyn toqtatqanyn aitty.France 24 telearnasyna bergen suhbatynda ol Armeniiaǵa qatysty ujymdyq qaýipsizdik týraly shart oryndalmaǵanyn atap ótti.
"Bizdiń oiymyzsha, Armeniiaǵa qatysty ujymdyq qaýipsizdik týraly shart, ásirese, 2021-2022 jyldary oryndalmady. Bul másele bizdiń nazarymyzdan tys qalmady. Biz osy shartqa qatysýdy toqtattyq. Ary qarai ne bolatynyn kóreiik", - dedi Pashinian suhbatynda.
Keiin Armeniia Syrtqy ister ministrliginiń baspasóz hatshysy Ani Badalian Armeniia 2024 jyly Ujymdyq qaýipsizdik sharty uiymyn (UQShU) qarjylandyrýǵa qatyspaitynyn da atap ótken bolatyn.
“Armeniia 2023 jylǵy 23 qarashadaǵy “UQShU-nyń 2024 jylǵa arnalǵan biýdjeti týraly” sheshimge qosylýdan jáne sol arqyly uiymnyń qyzmetin qarjylandyrýǵa qatysýdan bas tartady. Sondyqtan kelisimge qatysýshy elderdiń ortaq sharalaryn qarjylandyrýdy da doǵara turady. Sonymen birge Erevan bul sheshimniń shekteýli formatta qabyldanýyna qarsy bolmaidy”, - dedi Badalian.
