Arman Jumageldiev pen Qairat Qudaibergenniń alǵashqy soty qalai ótti?
Qairat Qudaibergen ótken jyldyń 22 sáýirinde ustaldy. 24 sáýir kúni sot qaýlysymen tergeý organdarynyń ótinishi qanaǵattandyrylyp, Qairat Qudaibergenge qatysty áreketti saralaý týraly qaýly shyǵarylǵanǵa deiin ony 30 táýlik merzimge kúzetpen ustaý túrindegi bultartpaý sharasyna sanktsiia berildi. Sodan beri ony qamaýda ustaý merzimi úzdiksiz uzartylyp keldi. Oǵan Qańtar oqiǵasy kezinde jappai tártipsizdikterdi uiymdastyrdy degen aiyp taǵylǵan.
Sot otyrysynda Qairat Qudaibergenniń anasy Bibigúl Kabdoldina balasyn bes aida alǵash ret kórgenin aitsa da, kúzetshiler jaqyndaýǵa ruqsat bermedi. Anasynyń aitýynsha, Qairat áleýmettik jelilerde býkmekerlik keńselermen jáne elektrondy temekilermen kúresýge shaqyrǵan beinerolikter taratty. «Oǵan bul áreketin toqtatý úshin million dollar usynyldy. Tipti ashyq qorqytty: toqtatpasań, túrmege jabamyz dedi. Ol qaiyrymdylyqpen imidj úshin ainalysty dep aiyptaldy», – dedi.
Birinshi otyrysta 42 aiyptalýshy men jábirlenýshiniń saýalnamalyq derekteri ǵana tyńdaldy. Kelesi otyrystyń qashan ótetini beimálim.
Al QR Bas prkýratýra 7 qańtarda ustalǵan «Dikii Arman» laqap atymen tanylǵan Arman Jumageldievtiń Ulttyq qaýipsizdik qyzmetiniń tergeý izoliatorynda otyrǵanyn málimdegen. Onyń da qamaýdaǵy ýaqyty birneshe ret uzartylyp keldi.
Aitpaqshy, Almaty sotynyń baspasóz qyzmeti málimdeme jasap úlgerdi. Iaǵni, sottyń resmi paraqshasynda advokattardyń atyshýly qylmystyq is boiynsha protseske jiberilmeýi týraly aqparat jariia boldy.
«Protsestiń barlyq qatysýshysyna №72 mekeme ǵimaratyna kirý jáne ótý orny, baǵyty týraly aldyn ala habarlama jiberildi. Birqatar adam sottalýshylardy ákeletin qyzmettik kireberisten ótýge tyrysty. Olarǵa mekemeniń negizgi baqylaý-ótkizý pýnkti arqyly kirý syzbasy qosymsha túsindirildi. Otyrys ashyq rejimde ótetindikten, noýtbýk, planshet jáne basqa qurylǵylardy paidalanýǵa tyiym salynbaǵan. Qurylǵylardy paidalanýda tehnikalyq másele týyndaýy múmkin, óitkeni tergeý izoliatorynda uialy bailanys shektelgen. № 72 mekemeniń ǵimaraty erekshe qorǵalatyn nysan bolǵandyqtan, aýmaqqa kirý kezinde jeke basyn kýálandyratyn qujat tekseriledi», – delingen Almaty sotynyń habarlamasynda.
