قايرات قۇدايبەرگەن وتكەن جىلدىڭ 22 ساۋىرىندە ۇستالدى. 24 ءساۋىر كۇنى سوت قاۋلىسىمەن تەرگەۋ ورگاندارىنىڭ ءوتىنىشى قاناعاتتاندىرىلىپ، قايرات قۇدايبەرگەنگە قاتىستى ارەكەتتى سارالاۋ تۋرالى قاۋلى شىعارىلعانعا دەيىن ونى 30 تاۋلىك مەرزىمگە كۇزەتپەن ۇستاۋ تۇرىندەگى بۇلتارتپاۋ شاراسىنا سانكسيا بەرىلدى. سودان بەرى ونى قاماۋدا ۇستاۋ مەرزىمى ۇزدىكسىز ۇزارتىلىپ كەلدى. وعان قاڭتار وقيعاسى كەزىندە جاپپاي تارتىپسىزدىكتەردى ۇيىمداستىردى دەگەن ايىپ تاعىلعان.
سوت وتىرىسىندا قايرات قۇدايبەرگەننىڭ اناسى بيبىگۇل كابدولدينا بالاسىن بەس ايدا العاش رەت كورگەنىن ايتسا دا، كۇزەتشىلەر جاقىنداۋعا رۇقسات بەرمەدى. اناسىنىڭ ايتۋىنشا، قايرات الەۋمەتتىك جەلىلەردە بۋكمەكەرلىك كەڭسەلەرمەن جانە ەلەكتروندى تەمەكىلەرمەن كۇرەسۋگە شاقىرعان بەينەروليكتەر تاراتتى. «وعان بۇل ارەكەتىن توقتاتۋ ءۇشىن ميلليون دوللار ۇسىنىلدى. ءتىپتى اشىق قورقىتتى: توقتاتپاساڭ، تۇرمەگە جابامىز دەدى. ول قايىرىمدىلىقپەن يميدج ءۇشىن اينالىستى دەپ ايىپتالدى»، – دەدى.
ءبىرىنشى وتىرىستا 42 ايىپتالۋشى مەن جابىرلەنۋشىنىڭ ساۋالنامالىق دەرەكتەرى عانا تىڭدالدى. كەلەسى وتىرىستىڭ قاشان وتەتىنى بەيمالىم.
ال ق ر باس پركۋراتۋرا 7 قاڭتاردا ۇستالعان «ديكيي ارمان» لاقاپ اتىمەن تانىلعان ارمان جۇماگەلدييەۆتىڭ ۇلتتىق قاۋىپسىزدىك قىزمەتىنىڭ تەرگەۋ يزولياتورىندا وتىرعانىن مالىمدەگەن. ونىڭ دا قاماۋداعى ۋاقىتى بىرنەشە رەت ۇزارتىلىپ كەلدى.
ايتپاقشى، الماتى سوتىنىڭ باسپا ءسوز قىزمەتى مالىمدەمە جاساپ ۇلگەردى. ياعني، سوتتىڭ رەسمي پاراقشاسىندا ادۆوكاتتاردىڭ اتىشۋلى قىلمىستىق ءىس بويىنشا پروسەسكە جىبەرىلمەۋى تۋرالى اقپارات جاريا بولدى.
«پروسەستىڭ بارلىق قاتىسۋشىسىنا №72 مەكەمە عيماراتىنا كىرۋ جانە ءوتۋ ورنى، باعىتى تۋرالى الدىن الا حابارلاما جىبەرىلدى. ءبىرقاتار ادام سوتتالۋشىلاردى اكەلەتىن قىزمەتتىك كىرەبەرىستەن وتۋگە تىرىستى. ولارعا مەكەمەنىڭ نەگىزگى باقىلاۋ-وتكىزۋ پۋنكتى ارقىلى كىرۋ سىزباسى قوسىمشا ءتۇسىندىرىلدى. وتىرىس اشىق رەجيمدە وتەتىندىكتەن، نوۋتبۋك، پلانشەت جانە باسقا قۇرىلعىلاردى پايدالانۋعا تىيىم سالىنباعان. قۇرىلعىلاردى پايدالانۋدا تەحنيكالىق ماسەلە تۋىنداۋى مۇمكىن، ويتكەنى تەرگەۋ يزولياتورىندا ۇيالى بايلانىس شەكتەلگەن. № 72 مەكەمەنىڭ عيماراتى ەرەكشە قورعالاتىن نىسان بولعاندىقتان، اۋماققا كىرۋ كەزىندە جەكە باسىن كۋالاندىراتىن قۇجات تەكسەرىلەدى»، – دەلىنگەن الماتى سوتىنىڭ حابارلاماسىندا.
