QR Mádeniet jáne sport ministri Arystanbek Muhamediulyn "azǵyn" dep aiyptaýshylardyń qatary taǵy bir qyzben tolyǵyp otyr. Ózin Júrgenov atyndaǵy Qazaq óner akademiiasynyń túlegimin dep tanystyrǵan jas qyz Azattyq radiosynyń "Nastoiashee Vremia" jobasyna suhbat bergen. Ol óziniń stýdent kezinde rektory A.Muhamediulynyń qyzdarǵa qalai qyryndaǵanyn aityp berdi.
Oqý ornynyń túlegi qaýipsizdik maqsatynda aty-jónin jariialaýdan jáne óziniń túrin kórsetýden bas tartqan. Aitýynsha, ony JOO-nyń sol kezdegi rektory A.Muhamediuly qushaqtamaq bolǵan kórinedi. Bóten erkekten qorǵaný maqsatynda stýdent rektordyń butynan teýip, kabinetinen qashyp shyǵypty.
- Ol aldymen meniń oqýdan shyǵyp qalǵanymdy, qaita qalpyna keltirýge bolmaitynyn aitty. "Qujattar Bilim ministrligine ketip qaldy" dedi. Men "uiatyńyz bilsin" dep jaýap qaitardym da, kabinetinen shyǵyp ketpekshi boldym. Sol kezde ol ornynan turyp: "Jaraidy, oqýyńdy rettep beremin, biraq qoshtasar aldyn bir qushaqtaiyn" dep maǵan qarai jaqyndady. Men odan qorǵaný úshin kúsh qoldandym: butynan tebýime týra keldi. Ol bolsa júre almai qaldy. Keiin bolǵan jaitty eshkimge aitpaýymdy jalynyp surady, - deidi akademiianyń túlegi.
Ol sondai-aq, Arystanbek Muhamediulynyń ózge de stýdentterge qyryndaǵanyn aityp berdi.
- Kúieýge shyqqan bir qyz bar edi. Burynǵy rektor oǵan da qyryndapty. Ómirin jumaqqa ainaldyramyn dep ýáde berse kerek. Biraq, kúieýi bar ekenin aityp, kezdesýden bas tartqan soń oǵan ózge usynys aitqan. "Sulý qurbylaryń kóp, eskort qyzmet kórseteiik" dep usynǵan eken... Keiinirek ózge qyzdyń tósek arqyly grantqa aýysqanyn da estidik, - deidi ol.
Eske salaiyq, Mádeniet jáne sport ministri Arystanbek Muhamediulynyń ústinen eń alǵash bolyp eks-aktrisa Eńlik Sadyqova shaǵym aitqan bolatyn. Ol óner akademiiasynda oqyp júrgen kezde A.Muhamediulynyń ózine qyryndaǵanyn, azǵyrǵanyn aityp, videoúndeý taratty. Munan keiin Qazaqstan halyq artisi Tuńǵyshbai Jamanqulov Eńliktiń sózin qýattap, jýrnalisterge suhbat berdi.
Búginde Arystanbek Muhamediulynan zábir kórdik degen qyz-kelinshekter qatary birshama artyp otyr. Olar ministrdiń otstavkasyn talap etýde. Al, Muhamediulynyń ózi bolsa munyń bárin jala dep taýyp, óziniń ar-namysyn sotta qorǵaýdy josparlap otyr.
Derekkóz: sn.kz
https://www.youtube.com/watch?v=Pu3jSSwGfB4
