وقۋ ورنىنىڭ تۇلەگى قاۋىپسىزدىك ماقساتىندا ءاتى-جونىن جاريالاۋدان جانە ءوزىنىڭ ءتۇرىن كورسەتۋدەن باس تارتقان. ايتۋىنشا، ونى جوو-نىڭ سول كەزدەگى رەكتورى ا.مۇحامەدي ۇلى قۇشاقتاماق بولعان كورىنەدى. بوتەن ەركەكتەن قورعانۋ ماقساتىندا ستۋدەنت رەكتوردىڭ بۇتىنان تەۋىپ، كابينەتىنەن قاشىپ شىعىپتى.

- ول الدىمەن مەنىڭ وقۋدان شىعىپ قالعانىمدى، قايتا قالپىنا كەلتىرۋگە بولمايتىنىن ايتتى. "قۇجاتتار ءبىلىم مينيسترلىگىنە كەتىپ قالدى" دەدى. مەن "ۇياتىڭىز ءبىلسىن" دەپ جاۋاپ قايتاردىم دا، كابينەتىنەن شىعىپ كەتپەكشى بولدىم. سول كەزدە ول ورنىنان تۇرىپ: "جارايدى، وقۋىڭدى رەتتەپ بەرەمىن، ءبىراق قوشتاسار الدىن ءبىر قۇشاقتايىن" دەپ ماعان قاراي جاقىندادى. مەن ودان قورعانۋ ءۇشىن كۇش قولداندىم: بۇتىنان تەبۋىمە تۋرا كەلدى. ول بولسا جۇرە الماي قالدى. كەيىن بولعان جايتتى ەشكىمگە ايتپاۋىمدى جالىنىپ سۇرادى، - دەيدى اكادەميانىڭ تۇلەگى.

ول سونداي-اق، ارىستانبەك مۇحامەدي ۇلىنىڭ وزگە دە ستۋدەنتتەرگە قىرىنداعانىن ايتىپ بەردى.

- كۇيەۋگە شىققان ءبىر قىز بار ەدى. بۇرىنعى رەكتور وعان دا قىرىنداپتى. ءومىرىن جۇماققا اينالدىرامىن دەپ ۋادە بەرسە كەرەك. ءبىراق، كۇيەۋى بار ەكەنىن ايتىپ، كەزدەسۋدەن باس تارتقان سوڭ وعان وزگە ۇسىنىس ايتقان. "سۇلۋ قۇربىلارىڭ كوپ، ەسكورت قىزمەت كورسەتەيىك" دەپ ۇسىنعان ەكەن... كەيىنىرەك وزگە قىزدىڭ توسەك ارقىلى گرانتقا اۋىسقانىن دا ەستىدىك، - دەيدى ول.

ەسكە سالايىق، مادەنيەت جانە سپورت ءمينيسترى ارىستانبەك مۇحامەدي ۇلىنىڭ ۇستىنەن ەڭ العاش بولىپ ەكس-اكتريسا ەڭلىك سادىقوۆا شاعىم ايتقان بولاتىن. ول ونەر اكادەمياسىندا وقىپ جۇرگەن كەزدە ا.مۇحامەدي ۇلىنىڭ وزىنە قىرىنداعانىن، ازعىرعانىن ايتىپ، ۆيدەوۇندەۋ تاراتتى. مۇنان كەيىن قازاقستان حالىق ءارتيسى تۇڭعىشباي جامانقۇلوۆ ەڭلىكتىڭ ءسوزىن قۋاتتاپ، جۋرناليستەرگە سۇحبات بەردى.

بۇگىندە ارىستانبەك مۇحامەديۇلىنان ءزابىر كوردىك دەگەن قىز-كەلىنشەكتەر قاتارى ءبىرشاما ارتىپ وتىر. ولار ءمينيستردىڭ وتستاۆكاسىن تالاپ ەتۋدە. ال، مۇحامەدي ۇلىنىڭ ءوزى بولسا مۇنىڭ ءبارىن جالا دەپ تاۋىپ، ءوزىنىڭ ار-نامىسىن سوتتا قورعاۋدى جوسپارلاپ وتىر.

دەرەككوز: sn.kz