Arystanbek Muhamediuly: «Abai Qunanbaiuly skripkada oinaǵan»
Sársenbi kúni óner salasy boiynsha Memlekettik syilyq «Qunanbai» tolyq metrajdy kórkem filmi úshin avtorlar ujymy – Doshan Qaliuly Joljaqsynov, Rýstam Odinaev, Aidos Jumadildiuly Bektemir jáne Nursifat Rahymbaiqyzy Salyqovaǵa berilgen bolatyn. Osy kino tóńireginde áńgime órbitken Mádeniet jáne sport ministri Qunanbaidyń aǵartýshylyq qyzmetine toqtaldy.
– Qunanbai aǵa sultan ǵana emes, aǵartýshy da bolǵan. Abai, Shákirim, Aqylbai syndy ainalasyndaǵy balalary men týystaryna, skripkashy mamanyn shaqyrtyp, oqytqan. Abai jas kezinde skripkada oinaǵan, – deidi A. Muhamediuly.
Aita keteiik, buǵan deiin Abaidyń úlken uly Aqylbaidyń saýyqshyl, ánshi, skripkashy bolǵany baspasóz betterinde jazylǵan edi.
Al Baýyrjan Erdembekov óziniń «Abaidyń ánshi shákirtteri» atty maqalasynda Qunanbai emes, Abai skripkashy mamandy shaqyrtyp, ainalasyndaǵylardy mýzykaǵa baýlyǵanyn jazady.
– Abai qasyndaǵy asa talantty ánshi-mýzykanttardy ataǵanda aldymen Muqa Ádilhanuly esimi aitylady. Sonaý Haliolla qaladan kelip júrgen kezderde Abai aýylynyń án men kúiin keltiretin Muqa kele-kele Abai aýylyndaǵy ánshiler mektebiniń ustazyna ainaldy. Mýzyka ónerin qaladan arnaiy úirenip kelgen Muqadan Kókbai, Shákárim, Aqylbai, Maǵaýiia, Kákitai, Turaǵul, Álmaǵambet, Muhamedjan, Ótegeldi taǵy birneshe jastar dombyra, garmon, skripka tartyp, mýzyka tilin úirenip shyǵady. Abaidyń Muqa siiaqty talantty aýylyna alǵyzýy siiaqty ónegeli isi óz shákirtteriniń ómir jolynda da jalǵasqan. Máselen, Maǵaýiia inisi Turaǵuldyń án-kúige áýestigin bilip Semeiden Iakov degen skripkashyny aldyryp, aqy tólep, Turaǵulǵa skripka úiretken. Muqanyń talantyn asa joǵary baǵalaǵan Abai ony mýzyka salasynda oqytý úshin Máskeý, Peterbor siiaqty úlken qalalarǵa jibermek bolyp, arnaiy kiim tikkizip, jol jabdyǵyn da daiyndaǵan kórinedi, – dep jazady avtor.
