V Dúniejúzilik kóshpendiler oiyndarynda alyptar saiysy boiynsha Azamat Maqulbekov jeńimpaz atandy. Kórermen kóz tikken tartysty básekede arystyq palýan qarsylas shaq keltirmei top jaryp, altyn medaldy jeńip aldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Alyptar básekesinde 16 elden kelgen 16 palýan bilektiń kúshin kórsetip synǵa tústi. Absoliýt salmaq dárejesinde synǵa túsken sportshylar bes saiystan ózara myqtyny anyqtady.
Atap aitqanda,100 keli tasty kóterip, ony 10 metrge jyljytý, 100 kelilik qappen otyryp turý, 10 kelilik naĭzany oń nemese sol qolmen 10 metr qashyqtyqta turǵan nysanaǵa laqtyrý, 130 kelilik bóreneni iyǵyna salyp, otyryp turý, salmaǵy 500 keli arbany 10 metrge súĭreý boiynsha synǵa tústi.
Túrkistan oblysy, Arys qalasynyń qairatty azamaty Azamat Maqulbekov bórene kóterý saiysynda 130 keli bóreneni 38 ret kóterip óz rekordyn jańartty. Sondai-aq aýyr naizany nysanaǵa laqtyrý saiysynda da eń úzdik nátijeni kórsetti.
Aqtyq synda, Azamat Maqulbekov 100 keli salmaqtaǵy serkeni 7 ret kóterdi. Jarysqa qatysýshylar ishinde salmaǵy eń az bolsa da, jerlesimiz jarty tonnalyq arbany qumnyń ústinde 12,9 metrge súiredi. Qortyndysynda, Qazaqstandyq alyp barlyq kezeńde kósh bastap, jeńimpaz atandy.
Jalpy alyptar básekesine Ispaniia, Úndistan, Qytai, Kýveit, Tatarstan, Iran, Resei qatarly 16 memleketten 16 sportshy baq synaǵan bolatyn.
