Arysta alǵash ret gaz tartyla bastady
Birer jylda Arys qalasynyń halqy ot jaǵyp, kúl shyǵarýdan túgeldei qutylady. Buǵan deiin kógildir otyny bolmaǵan shaharda alǵash ret gazdandyrý jumystary júrgizilýde. Túrkistan oblysy ákiminiń baspasóz qyzmeti uiymdastyrǵan press-týr kezinde BAQ ókilderi qalanyń kommýnaldyq máselelerimen tanysty.
Atap aitqanda, Arys qalasy, Aqdala jáne Qojatoǵai aýyldyq okrýgterindegi eldi mekenderdi tabiǵi gazben qamtamasyz etý jumystary júrgizilýde. Bul sharýalarǵa dep oblystyq biýdjetten 88,9 mln. teńge qarjy bólingen.
– Birinshi kezeń boiynsha nysannyń qurylys jumystaryn júrgizýge oblystyq biýdjetten biyl 884,0 mln teńge, 2019 jylǵa 500,0 mln teńge, 2020 jylǵa 1581,0 mln. teńge qarjy qaralyp otyr. Ekinshi kezeńniń qurylys jumystaryna respýblikalyq qazynadan biylǵa 719,8 mln teńge, 2019 jylǵa 219,7 mln teńge qarjy bólinýde. Al, kezeńde 567,0 mln. teńgeni igeremiz dep otyrmyz. Eger osy jumystar aiaqtalsa, qalamyzdyń 50 myńǵa jýyq halqy kógildir otynǵa qol jetkizedi. Jalpy 2018-2025 jyldary qalaǵa qarasty 26 eldi mekendi tabiǵi gazben qamtamasyz etý josparlanýda. Bul qala halqynyń 99,5% quraityn bolady, – dedi Arys qalasynyń ákimi Qadyrbek Murat.
Sondai-aq, onda aýyz sý máselesi de ońtaily sheshilýde. Qazirgi tańda qalanyń Taldyqudyq jáne Otyrar turǵyn aýdanyndaǵy magistraldy sý ótkizgish toraptarynyń qurylys jumystary júrgizilýde. 2016 jyly smetalyq quny 803,024 mln. teńgeni quraityn memlekettik saraptama qorytyndysy shyqsa, ótken jyly qurylys jumystary bastalǵan. Jospar boiynsha nysan jyl sońyna deiin tapsyrylady.
Túrkistan oblysy ákiminiń baspasóz qyzmeti
