Arab jazýy bar týmen sýretke túsken tórtinshi qyzǵa sot úkimi shyqty. Kúni keshe sýrettegi tek úsh qyzǵa sot úkimi shyqqan bolatyn, dep habarlaidy Dalanews.kz.
Is Atyraý qalasynyń ákimshilik quqyq buzýshylyqtar jónindegi mamandandyrylǵan sotynda qaraldy. Sýrettegi tórtinshi qyz A.-ǵa qatysty ákimshilik quqyq buzýshylyq týraly is qaraldy (usaq buzaqylyq).
Sotta 23 naýryzda kámeletke tolmaǵan A. basqa úsh qyzben birge Atyraý qalasyndaǵy muz aidyny ǵimaratynda arab tilindegi jazýy bar Qazaqstan Respýblikasynyń týymen sýretke túsip, ony áleýmettik jeli arqyly taratyp, usaq buzaqylyq jasaǵany anyqtaldy.
Sýrettegi qyzdyń ákimshilik quqyq buzýshylyq jasaýdaǵy kinási ákimshilik quqyq buzýyshylyq týraly hattamamen, fotosýretpen, baianatpen jáne basqa da is materialdarymen tolyq dáleldendi.
Sot qaýlysymen kámeletke tolmaǵan A.-nyń zańdy ókiline ákimshilik jaza retinde 39 320 teńge ákimshilik aiyppul salyndy. Sot qaýlysy zańdy kúshine engen joq.
Kúni keshe sýrettegi úsh qyzǵa sot úkimi shyqqan bolatyn.
- N.-ǵa jaýaptylyǵyn aýyrlatatyn mán-jaidy eskere otyryp (kámeletke tolmaǵan adamdy ákimshilik quqyq buzýshylyqqa tartý; adamdar tobynyń ákimshilik quqyq buzýshylyq jasaýy), 15 táýlikke ákimshilik qamaqqa alý túrindegi ákimshilik jaza qoldanyldy.
- A.-ǵa ákimshilik jaza retinde 78 640 teńge ákimshilik aiyppul salyndy.
- Kámeletke tolmaǵan H.-nyń zańdy ókiline ákimshilik jaza retinde 39 320 teńge ákimshilik aiyppul salyndy.
Sýrettegiler Saýd Arabiiasy týynyń elementteri bar Qazaqstan Týyn ustap turǵany kórinedi. Al sýret Atyraý qalasyndaǵy Hiýaz Dospanova atyndaǵy Muz saraiynda túsirilgen.
