اراب جازۋى بار تۋمەن سۋرەتكە تۇسكەن ءتورتىنشى قىزعا سوت ۇكىمى شىقتى. كۇنى كەشە سۋرەتتەگى تەك ءۇش قىزعا سوت ۇكىمى شىققان بولاتىن، دەپ حابارلايدى Dalanews.kz.

ءىس اتىراۋ قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتىندا قارالدى. سۋرەتتەگى ءتورتىنشى قىز ا.-عا قاتىستى اكىمشىلىك قۇقىق بۇزۋشىلىق تۋرالى ءىس قارالدى (ۇساق بۇزاقىلىق).

سوتتا 23 ناۋرىزدا كامەلەتكە تولماعان ا. باسقا ءۇش قىزبەن بىرگە اتىراۋ قالاسىنداعى مۇز ايدىنى عيماراتىندا اراب تىلىندەگى جازۋى بار قازاقستان رەسپۋبليكاسىنىڭ تۋىمەن سۋرەتكە ءتۇسىپ، ونى الەۋمەتتىك جەلى ارقىلى تاراتىپ، ۇساق بۇزاقىلىق جاساعانى انىقتالدى. 

سۋرەتتەگى قىزدىڭ اكىمشىلىك قۇقىق بۇزۋشىلىق جاساۋداعى كىناسى اكىمشىلىك قۇقىق بۇزۋىشىلىق تۋرالى حاتتامامەن، فوتوسۋرەتپەن، باياناتپەن جانە باسقا دا ءىس ماتەريالدارىمەن تولىق دالەلدەندى.

سوت قاۋلىسىمەن كامەلەتكە تولماعان ا.-نىڭ زاڭدى وكىلىنە اكىمشىلىك جازا رەتىندە 39 320 تەڭگە اكىمشىلىك ايىپپۇل سالىندى. سوت قاۋلىسى زاڭدى كۇشىنە ەنگەن جوق.

كۇنى كەشە سۋرەتتەگى ءۇش قىزعا سوت ۇكىمى شىققان بولاتىن. 

• ن.-عا جاۋاپتىلىعىن اۋىرلاتاتىن ءمان-جايدى ەسكەرە وتىرىپ (كامەلەتكە تولماعان ادامدى اكiمشiلiك قۇقىق بۇزۋشىلىققا تارتۋ؛ ادامدار توبىنىڭ اكiمشiلiك قۇقىق بۇزۋشىلىق جاساۋى)، 15 تاۋلىككە اكىمشىلىك قاماققا الۋ تۇرىندەگى اكىمشىلىك جازا قولدانىلدى.
• ا.-عا اكىمشىلىك جازا رەتىندە 78 640 تەڭگە اكىمشىلىك ايىپپۇل سالىندى.
• كامەلەتكە تولماعان ح.-نىڭ زاڭدى وكىلىنە اكىمشىلىك جازا رەتىندە 39 320 تەڭگە اكىمشىلىك ايىپپۇل سالىندى.