Arab qarjy institýttary Qazaqstan ekonomikasyna 7 milliard dollar kóleminde investitsiia salatyn boldy. Aldaǵy ýaqytta bul soma artýy múmkin dep habarlaidy Dalanews.kz.
Bul jańalyq Arab konsýltatsiialyq tobynyń otyrysynan keiin jariialandy. Sonymen birge osy otyrysta birneshe qujatqa qol qoiyldy. Konsýltatsiialyq keńes quramyna Islam damý banki, Saýd Arabiiasynyń damý qory, OPEK halyqaralyq damý qory, Kýveittiń arab ekonomikalyq damý qory jáne Ábý-Dabi damý qory siiaqty institýttar kiredi.
⠀
«Osy kelisimder aiasynda Qazaqstan ekonomikasyna jalpy somasy 7 mlrd dollardai uzaq merzimdik tikelei investitsiia tartylady desedi. Ýaqyt óte kele bul soma artýy múmkin», – delingen Premer-ministrdiń baspasóz qyzmeti taratqan málimdemede.
⠀
Arab konsýltatsiialyq tobynyń músheleri Qazaqstan úshin basym sanalatyn baǵyttaǵy salalarǵa qarjylai qoldaý kórsetedi. Sondai-aq, Qazaqstan biligi investorlarǵa kólik, energetika, sý resýrstary, densaýlyq saqtaý salasyndaǵy ártúrli joba men Qazaqstannyń 2030 jylǵa deiingi Ulttyq infraqurylym josparyn usyndy.
⠀
Katardan kelgen biznes ókilderi Qazaqstanǵa qyzyǵýshylyq tanytyp, «Bereke Bank» pen Tele2 jáne Altel uialy bailanys operatorlaryn satyp aldy. 2024 jyldyń naýryz aiynda Qazaqstan temir jolynyń enshiles kásiporny KTZ Express BAÁ-niń AD Ports Group kompaniiasymen birlesken kásiporyn qurýdy josparlap otyrǵanyn habarlady. Bul kásiporyn Qazaqstan men Reseiden Parsy shyǵanaǵy elderine, Pákistan, Úndistan jáne Soltústik Afrikaǵa júk tasymalyn jetkizedi.
