Ara men gúldiń muńy
– Árine, meni jaqsy kórgeniń janymdy jadyratady. Biraq boiymdaǵy bar nárimdi soryp alatynyń jaman, – depti Gúl Araǵa ókpelep.
– Ainalanyń hosh is pen sulýlyqqa bólegen Gúlim, seniń tátti shyrynyń bizge azyq bolyp tur ǵoi. Biz seniń shyrynyńdy ǵana alyp qoimaimyz, sonymen qatar senderdi kóktemde tozandandyryp, jer álemge taralýlaryń da kómektesetinimizdi de umytpa, – deidi Ara.
– Iá, Arajan seniń arqańda jan-aqqa taralyp jatqanymyzdy bilemiz. Ol úshin saǵan alǵystan basqa aitarymyz joq. Shyndyǵynda bizdiń ýaiymymyz basqa. Adamdar bizdi bir-birine qýanysh syilaý úshin julyp alyp, syiǵa tartady. Bizder eki-úsh kún Adamdarǵa qýanysh syilap, tórinde turamyz. Al boiymyzdan ál ketip solyp qalǵannan keiin laqytyryp tastaidy. Keide ǵumyrymyzdyń osylai kelte bolǵanyna qatty kúiinemin, – dep Gúl taǵy da Araǵa muńaia qaraidy.
– Ýaimyńdy bir kisidei túsinemin. Óitkeni biz de Adamdardan birshama zábir kórip júrmiz. Bizder kúni boiy bir tynbai, gúlden-gúlge qonyp shyryn jinaimyz. Sol jinaǵan shyrynymyz adamdar bir kúnde kelip, jartysyn alyp ketedi. Olardyń osy áreketi bizge de unamaidy, – dep Ara da Gúlge muńyn shaǵady. Sonda Gúl:
– Qaitemiz endi... Jaratýshy bizdi Adamdar úshin kerek qylyp jaratty. Ana Tikenek sekildi bolsaq, eshkimge kerek bolmai ár jerde shashylyp jatar edik, – deidi Gúl sulý tereń kúrsinip.
– Ras aitasyń, bul jaratylystyń zańy ǵoi. Sondyqtan oǵan qarsy shyqqanymyz jaramas, – dep Ara basqa Gúldiń shyrynyn jinaý úshin usha jóneledi.
