Ońai oljaǵa kenelem dep oilaǵandar milliondap qarajat salǵandaryn aitady. Ol azdai, basyndaǵy páterin, astyndaǵy kóligin sol kúdikti qarjylyq mekemege ustata salǵandar da jetedi. Jeme-jemge kelgende ne eselep qaitqan aqsha joq, iá, ýideni úiip-tókken basshy joq, salymshylar sendelip júr. Aldanyp qalǵandardyń aqshasyn kim qaitarady?
Seńdei soǵylysqan adamdar ózderin óńirge tanymal qarjylyq uiymnyń salymshylarymyz deidi. Kameraǵa sóileýge qulyqsyz. Degenmen qaltalaryndaǵy aqshasyn eselep kóbeitý úshin bergen. Árkim ártúrli soma salypty.
300 myńnan bastap 5-6 mln teńgeniń kóligin ótkizgender de bar eken.
Salymshylardyń aiýynsha, uiym qarajattan bólek, kólik, páterdi de qabyldaǵan. Aiyna ústindegi 30 paiyzyn berip turýǵa kelisipti. Keiin ony 40 paiyzǵa deiin kóterdi deidi. Alaida, paidaǵa qaryq boldym degenderden góri, jer sipap qalǵandar kóp jinalǵandardyń arasynda. Keńsege basa-kóktep kirip barǵan salymshylar buryshta turǵan seifke jarmasty. Politseilerdiń tártipke shaqyrǵanyna qaramastan, kóterip alyp, syrtqa alyp shyqpaqshy boldy.
Aýzy kúigen salymshylardiń keibiri keńseniń ishindegi kóp qujattyń arasynan ózderiniń kelisim-sharttaryn izdep, sharq urdy. Al bireýleri qalaida seifti ashý kerek dep jatty.
Bul uiym qarjylyq piramida ma, joq pa, ony ázir aita almaimyz deidi, politseiler. Áýeli basshylary týraly málimetterdi anyqtap, keiin jaýap alatyndaryn málimdedi.
Halyqty qaryq qylamyz dep, taqyrǵa otyrǵyzyp ketken qarjylyq mekeme jalǵyz bul emes. Buǵan deiin aqtóbelik politseiler taǵy bir qarjylyq uiymnyń basshylaryn qamaýǵa alǵan bolatyn. Aldanyp, jer sipap qalǵan salymshylardyń sany 15 myńǵa jetken. Olar 300 myńnan 5 mln teńgege deiin qarajat salǵany belgili boldy.
https://www.youtube.com/watch?v=u_U0l9HAv-M
