Aqtóbede zeinetkerdiń shotyndaǵy zeinetaqysy tolyq kólemde salyq bereshegin óteýge ustalyp qalǵan. Bul áreketti zańsyz dep tanyǵan sot memlekettik kirister organdaryna zeinetkerge artyq alynǵan somany qaitarýdy mindettedi, dep habarlaidy Dalanews.kz.
Jaǵdaidyń jai-japsary
Sot materialdaryna sáikes, er azamat 2002 jyldan beri jeke kásippen ainalysyp kelgen. 2024 jyly zeinetkerlikke shyǵyp, memleketten beriletin zeinetaqyny "Qazposhtadaǵy" shotyna ala bastaǵan. Alaida kásipkerdiń salyq organdaryna 1 288 353 teńge bereshegi anyqtalǵannan keiin, memlekettik kirister organdary onyń esepshotyndaǵy shyǵys operatsiialaryn toqtatyp, sol qaryzdy tolyq kólemde – zeinetaqysynyń búkil somasynan óndirip alǵan.
Zań boiynsha azamattyń zeinetaqysynan eń kóbi 50 paiyzy ǵana ustalý kerek. Sondyqtan zeinetker bastapqyda memlekettik kirister organdaryna artyq ustalǵan somanyń jartysyn qaitarýdy surap ótinish túsirgen. Alaida ótinishi qanaǵattandyrylmaǵan soń, ol sotqa júginýge májbúr boldy.
Sot ne dedi?
Sot zeinetkerdiń konstitýtsiialyq quqyǵy buzylǵanyn atap ótip, bul jaǵdaidy "zańǵa qaishy" dep baǵalady.
"2024 jyldyń qazan aiynan bastap talapkerdiń bank shotyna túsetin zeinetaqysy tolyǵymen salyq qaryzyn óteýge ustalyp kelgen. Bul – Konstitýtsiiamen kepildik berilgen zeinetaqy alý quqyǵyn shekteý, azamattyń zańdy múddesin buzý bolyp sanalady", – dep málimdedi sot.
Nátijesinde sot memlekettik kirister organdaryna zeinetkerdiń shotynan "Qazposhta" arqyly artyq ustalǵan somany keri qaitarýdy mindettedi.
