Jańa kárizdik tazartý qondyrǵysy 45 jyldan beri paidalanylyp kele jatqan qoldanystaǵy stantsiianyń ornyn almastyrady, dep habarlaidy dalanews.kz.
Jobany iske asyrý káriz júiesiniń tozǵan infraqurylymyn jańartýǵa, ortalyqtandyrylǵan káriz júiesimen qamtylǵan halyq úlesin arttyrýǵa jáne qalanyń bolashaq damýyna qajetti qýat rezervin qalyptastyrýǵa múmkindik beredi.
Aqtóbe oblysynyń ákimi Ashat Shaharov Aqtóbe qalasyndaǵy jańa kárizdik tazartý stantsiiasynyń qurylys alańyna bardy. Ol joba jáne bolashaq nysannyń tehnologiialyq sheshimderimen tanysty.
Qoldanystaǵy káriz tazartý kesheni 1981 jyly paidalanýǵa berilgen. Búginde onyń tozý deńgeii shamamen 70%-dy quraidy. Táýligine kelip túsetin aǵyndy sýdyń ortasha kólemi 70–80 myń tekshe metr bolsa, sý tasqyny kezeńinde bul kórsetkish 95 myń tekshe metrge deiin jetedi. Qazirgi tańda Aqtóbe halqynyń shamamen 62%-y ortalyqtandyrylǵan káriz júiesimen qamtylǵan.
Jańa KTQ táýligine 100 myń tekshe metr aǵyndy sýdy tazartýǵa qaýqarly. Al eń joǵary júkteme kezinde onyń ónimdiligi 130 myń tekshe metrge deiin jetedi. Qurylysty 2028 jyldyń mamyrynda aiaqtaý josparlanýda. Jobanyń jalpy quny shamamen 43 mlrd teńge.
«Aqtobe su-energy group» AQ bas direktory Naǵymjan Aldiiarovtyń aitýynsha, jańa stantsiianyń basty ereksheligi – tórt deńgeili tazartý júiesiniń engizilýi. Tehnologiialyq úderiske mehanikalyq jáne biologiialyq tazartý, ýltrakúlgin sáýlemen zalalsyzdandyrý, sondai-aq biogaz óndirý arqyly tunbany óńdeý kiredi. Tunbany keptirip, túiirshikterge ainaldyrý, al biogazdy elektr energiiasyn óndirýge paidalaný josparlanǵan.
«Jańa keshenniń qurylysy – bul qalanyń damýymen qatar, ekologiialyq jáne sanitariialyq qaýipsizdikke bailanysty qajettilik. Jobany qarjylandyrý memlekettik kepildikpen Eýropalyq qaita qurý jáne damý bankiniń nesie qarajaty esebinen júzege asyrylady. Qaryzdy óteý jáne oǵan qyzmet kórsetý shyǵyndarynyń 90%-yna deiin respýblikalyq biýdjet, al keminde 10%-y jergilikti biýdjetten qamtamasyz etiledi. Iaǵni, barlyq qarjylyq júkteme turǵyndardyń moinyna artylmaidy. Jańa stantsiia táýligine 130 myń tekshe metrge deiin aǵyndy sýdy óńdei alady. Bul qala úshin uzaqmerzimdi perspektivaǵa qajetti qýat rezervin qalyptastyrýǵa múmkindik beredi. Joba aiasynda qoldanystaǵy infraqurylym boiynsha da jumystar qarastyrylǵan. Atap aitqanda, tazartylǵan sýdy burýǵa arnalǵan eki qubyrdy sanatsiialaý jáne germetizatsiialaý josparlanýda», – dedi óńir basshysy.
Nysanda jumystar bastalyp ketti. Qurylys alańyna merdiger uiymnyń mamandary jumyldyrylǵan. Jumystar aýqymy keńeigen saiyn jumysshylar sanyn 350 adamǵa deiin arttyrý josparlanyp otyr.
Jańa KTQ paidalanýǵa berilgennen keiin tazartylǵan sýdy balyq sharýashylyǵy maqsatynda paidalanýǵa nemese belgilengen ekologiialyq talaptar saqtalyp, qajetti jobalyq qujattama bolǵan jaǵdaida sý nysanyna aǵyzýǵa bolady.
Qoldanystaǵy tazartý qondyrǵylary jańa stantsiia iske qosylǵanǵa deiin jumysyn jalǵastyrady. Odan keiin qazirgi KTQ odan ári paidalaný jaǵdaiy jáne ony rekonstrýktsiialaý qajettiligi aiqyndalady.
Jobany iske asyrý qalanyń sý burý júiesindegi mańyzdy nysandy jańǵyrtý, aǵyndy sýlardy tazartý sapasyn arttyrý jáne Aqtóbeniń odan ári damýyna múmkindik beredi.
