Pavlodarda prokýratýra qyzmetkeri kólik júrgizip kele jatyp, áieldi qaǵyp ketti, dep habarlaidy dalanews.kz.
Jol-kólik oqiǵasy 13 tamyz kúni saǵat 18:39-da Nurmaǵambetov – Kamzin kósheleriniń qiylysynda bolǵan.
«Oqiǵa ornyna shaqyrtý 13 tamyz kúni saǵat 18:39-da tústi. Sebebi – jaiaý júrginshini qaǵý. Oqiǵa ornynan 60 jastaǵy áiel Sultanov atyndaǵy oblystyq klinikalyq aýrýhanaǵa jetkizildi», – dep habarlady Pavlodar oblystyq jedel meditsinalyq járdem stantsiiasy.
Oblystyq prokýratýra kólik tizgininde qadaǵalaý organynyń qyzmetkeri bolǵanyn rastady.
Atalǵan fakti boiynsha QR Qylmystyq kodeksiniń 345-baby 2-bóligi boiynsha sotqa deiingi tergeý bastaldy. Atalǵan bap kólik quralyn basqaratyn adamnyń jol qozǵalysy nemese kólikti paidalaný qaǵidalaryn buzyp, abaisyzda adamnyń densaýlyǵyna aýyrlyǵy ortasha ziian keltirýine qatysty.
Tergeý barysynda jol-kólik oqiǵasynyń barlyq mán-jaiy anyqtalady.
