Almatyda «Almaty – bilim men innovatsiia ortalyǵy: jańa halyqtyq konstitýtsiia qundylyqtary negizinde adami kapitaldy damytý» taqyrybynda pedagog qyzmetkerlerdiń dástúrli tamyz konferentsiiasy ótti, dep habarlaidy dalanews.kz.
Respýblika saraiynda ótken is-sharaǵa Almaty ákimi Darhan Satybaldy qatysty.
Konferentsiiada 2026–2027 oqý jylyna arnalǵan bilim berý júiesiniń negizgi mindetteri aiqyndaldy. Ásirese, bilim sapasyn arttyrýǵa, oqýshylardyń tsifrlyq quzyretin damytýǵa, jasandy intellektini engizýge, sondai-aq «Adal azamat» jáne «Zań men tártip» qundylyqtaryn nyǵaitýǵa basa nazar aýdaryldy.
«Bizdiń aldymyzda jasalǵan múmkindikterdi naqty ári ólshenetin nátijege ainaldyryp, balalarymyzdyń bilim sapasynyń turaqty ósýin qamtamasyz etý mindeti tur. Bul rette muǵalimniń kásibi sheberligi men ár mektep jumysynyń tiimdiligi sheshýshi mánge ie. Memleket basshysy Qasym-Jomart Toqaevtyń tapsyrmasymen Almatyda 2026–2029 jyldarǵa arnalǵan orta bilim berý júiesine jasandy intellektini engizýdiń óńirlik jospary júzege asyrylyp jatyr. «Almaty Digital Mektebi» biryńǵai qalalyq tsifrlyq platformasy kezeń-kezeńimen engizilýde. Qaladaǵy barlyq mektep joǵary jyldamdyqty internetpen qamtamasyz etilgen, bilim berý úderisine qatysatyn 200 myńnan astam adam jasandy intellekt quraldaryn paidalanady. Jańa oqý jylynda pedagogterdiń AI-quzyretterin arttyrý, 60 pándik kabinetti jabdyqtaý jáne beiindi zerthanalardy damytý jumystary jalǵasady», – dedi Darhan Satybaldy.
Mamanmen qamtamasyz etý máselesine erekshe nazar aýdaryldy. 2027–2030 jyldary asa suranysqa ie pedagogikalyq baǵyttar boiynsha Almaty ákimi granttaryn bólý josparlanyp otyr. Oqý ornyn aiaqtaǵan túlekter keiin qala mektepterine jumysqa ornalastyrylady.
Bilim berý infraqurylymyn damytý jumystary jalǵasýda. Ótken jyly 40 myńǵa jýyq orynǵa arnalǵan 37 bilim berý nysany paidalanýǵa berildi. Jańa oqý jylynyń basyna deiin 8 jańa mektep pen 3 jańa korpýs ashylyp, 11 950 oqýshy orny qurylady.
Almaty bilim sapasy boiynsha joǵary kórsetkishterin saqtap keledi. Qala oqýshylary 24 jyl qatarynan elimizdiń úzdik olimpiadalyq komandasy atanyp otyr. 2026 jyly segiz oqýshy halyqaralyq pándik olimpiadalardyń jeńimpazy jáne júldegeri atandy. Pedagogter de joǵary nátije kórsetip keledi: Almatynyń jeti muǵalimi «Úzdik pedagog – 2025» baiqaýynyń jeńimpazy atansa, №95 mektep-litseiiniń muǵalimi Tatiana Beloýsova Global Teacher Prize nusqasy boiynsha álemniń úzdik 50 pedagoginiń qataryna endi.
Konferentsiia aiasynda bilim berý salasynyń úzdik ókilderi marapattaldy. Kásibi sheberligi, kópjyldyq eńbegi jáne óskeleń urpaqty tárbieleýge qosqan úlesi úshin pedagogterge Almaty ákiminiń alǵys hattary men Qazaqstan Respýblikasy Oqý-aǵartý ministrliginiń vedomstvolyq nagradalary tabystaldy. Sondai-aq, qalanyń úzdik bilim berý uiymdary anyqtaldy: Ybyrai Altynsarin atyndaǵy №159 gimnaziia úzdik orta bilim berý uiymy dep tanylyp, qala ákiminiń 68 mln teńge kólemindegi grantyna sertifikat aldy. Almaty tehnologiialyq kolledji úzdik tehnikalyq jáne kásiptik, orta bilimnen keiingi bilim berý uiymy dep tanylyp, oǵan da materialdyq-tehnikalyq bazany damytýǵa jáne ǵylymi-ádistemelik qamtamasyz etýge 68 mln teńge kóleminde grant bólindi.
Konferentsiia qorytyndysy boiynsha jańa oqý jylyna arnalǵan negizgi mindetter – oqýshylardyń bilim sapasyn arttyrý, pedagogterdiń kásibi damýyn qamtamasyz etý, mektep basshylarynyń jaýapkershiligin kúsheitý jáne bilim berý uiymdaryna ataýly qoldaý kórsetý aiqyndaldy.
