Qaraǵandy oblysynda 13 jańa mektep salyndy. Onyń 10-y «Keleshek mektepteri» ulttyq jobasy aiasynda boi kóterdi. Jańa oqý oryndary oqýshylar sanynyń artýy eskerilip, qosymsha bilim berý oryndaryna degen qajettilikti óteýge baǵyttalǵan. Mektep infraqurylymyn damytý máseleleri Qaraǵandyda ótken «Jańa Halyq Konstitýtsiiasynyń normalary men qundylyqtary: adami kapitaldy damytý – bilim berý júiesiniń strategiialyq negizi» atty tamyz konferentsiiasynda talqylandy, dep habarlaidy dalanews.kz.
Konferentsiia jumysyna Qazaqstan Respýblikasy Oqý-aǵartý ministrliginiń, óńirlik bilim basqarmasynyń, Qazaqstan Respýblikasy Konstitýtsiialyq Sotynyń, memlekettik organdar men úkimettik emes uiymdardyń ókilderi qatysýda. Konferentsiia jumysyna oflain jáne onlain formatta barlyǵy 10 myńnan astam adam qosyldy.
– Memleket basshysy atap ótkendei, «sapaly bilim – álemdegi ozyq, órkenietti ári básekege qabiletti el bolýdyń kepili». Osy turǵydan alǵanda, adami kapitaldy damytý memlekettiń basty basymdyqtarynyń biri retinde aiqyndalǵan Konstitýtsiianyń jańa normalaryna nazar aýdarýymyz qajet. Oblys biýdjetiniń shamamen jartysy bilim berý salasyna baǵyttalady. Bul jai ǵana shyǵyn emes, bolashaqqa salynǵan investitsiia. Bizdiń mindetimiz – óńirdiń ósip kele jatqan qajettilikterine jaýap beretin zamanaýi bilim berý infraqurylymyn qalyptastyrý. Oqýshylar sanynyń artýyna qaramastan, bilim berý uiymdaryna túsetin júktemeni kezeń-kezeńimen azaityp kelemiz, – dedi tamyz keńesin ashqan Qaraǵandy oblysynyń ákimi Ermaǵanbet Bólekpaev.
Biyl bilim berýdiń 200-ge jýyq nysanyn jóndeýge 15 mlrd teńgeden astam qarjy bólindi. Oblys ákiminiń aitýynsha, bul qarajat bilim berý ortasynyń sapasy men qaýipsizdigin arttyrýǵa baǵyttalýy tiis.
Óńirde mektepterdiń materialdyq-tehnikalyq bazasyn nyǵaitý jumystary da jalǵasýda. Oqý kabinetteri robototehnika, STEM, himiia jáne fizika baǵyttaryna arnalǵan zamanaýi jabdyqtarmen jaraqtandyrylýda. Aýyldardaǵy tirek jáne magnittik mektepterge erekshe kóńil bólinedi. Negizgi maqsat – aýyl balalarynyń qaladaǵy qurdastarymen birdei bastapqy múmkindikterge ie bolýyn qamtamasyz etý.
Daryndy balalarǵa arnalǵan mamandandyrylǵan mektepter jelisin damytý da bilim berý saiasatynyń mańyzdy baǵyttarynyń biri bolyp otyr.
«Adal azamat» tujyrymdamasy aiasyndaǵy tárbie jumysy da bilim berý saiasatynyń ajyramas bóligi retinde jalǵasýda. Bilim berý uiymdarynda balalardyń qaýipsizdigin qamtamasyz etýge, quqyqtyq saýattylyǵyn arttyrýǵa, býlling pen aýtodestrýktivti minez-qulyqtyń aldyn alýǵa baǵyttalǵan jumystar kúsheitildi. Onyń nátijesinde jasóspirimder arasyndaǵy quqyq buzýshylyq deńgeii negizgi kórsetkishterdiń barlyǵy boiynsha tómendedi.
Qazaqstan Respýblikasynyń jańa Konstitýtsiiasyn qabyldaý eldiń damýyndaǵy mańyzdy kezeńderdiń birine ainalyp, quqyqtyq mádenietti qalyptastyrý men óskeleń urpaqty tárbieleýdiń jańa baǵyttaryn aiqyndady. Negizgi zańda balanyń quqyqtary men zańdy múddelerin qorǵaýǵa airyqsha basymdyq berilgen.
– Bala konstitýtsiialyq qundylyqtardyń eń mańyzdylarynyń biri retinde tanylady. Onyń quqyqtary men múddelerin qorǵaý – búkil memlekettiń ortaq mindeti. Memleket kez kelgen sheshimdi qabyldaǵanda balanyń múddesin basshylyqqa alýy qajet. Sondyqtan balanyń óz quqyqtaryn ǵana bilip qoimai, mindetteri men jaýapkershiligin de túsinýi, sondai-aq quqyqtary men bostandyqtary buzylǵan jaǵdaida qaida jáne qalai júginý kerektigin bilýi asa mańyzdy, – dedi Qazaqstan Respýblikasy Konstitýtsiialyq Sotynyń sýdiasy Aijan Jatqanbaeva.
Sonymen qatar oqýshylardyń kitap oqýǵa degen qyzyǵýshylyǵyn arttyrýǵa jáne bilimge umtylysyn qalyptastyrýǵa airyqsha mán berilýde.
Ótken jyldan bastap oblys ákiminiń tapsyrmasyna sáikes pedagog kadrlardyń rezervin qalyptastyrý jumystary júrgizilip keledi.
Dástúr boiynsha tamyz konferentsiiasynda bilim berý salasyna eleýli úles qosqan úzdik pedagogter vedomstvolyq nagradalarmen jáne tósbelgilermen marapattaldy.
Uzaq jylǵy eńbegi men bilim berý salasyn damytýǵa qosqan úlesi úshin Osakarov aýdanyndaǵy Abai atyndaǵy tirek mektebiniń (resýrstyq ortalyq) muǵalimi Elena Vasilevna Prisiajniýk «Ybyrai Altynsarin» medalimen marapattaldy.
– Eńbegimniń elenip, laiyqty baǵalanǵany qýantady. Men 38 jyldan beri orys tili men ádebieti páninen sabaq berip kelemin. Jumysta qajyp ketpeý úshin, eń aldymen, óz mamandyǵyńdy jáne balalardy jaqsy kórý kerek shyǵar. Sonymen qatar únemi óz bilimińdi jetildirip otyrý qajet. Adam árdaiym damýǵa umtylýy tiis, – dep óz oiymen bólisti Elena Vasilevna.
Konferentsiia ótip jatqan akademik E. A. Bóketov atyndaǵy Qaraǵandy ýniversitetiniń bas korpýsyndaǵy hollda innovatsiialyq bilim berý jobalarynyń kórmesi uiymdastyryldy. Kórme ekspozitsiiasyna zamanaýi tsifrlyq jáne IT ázirlemeler, mektepke deiingi, orta, tehnikalyq jáne kásiptik bilim berý uiymdarynyń innovatsiialyq jobalary, sondai-aq inkliýzivti bilim berý men tárbie jumysyna arnalǵan ozyq sheshimder usynyldy.
