Aqtóbe oblysynda tórt adamnyń ólimine ákelgen jol-kólik oqiǵasyna qatysty úsh jyldan astam ýaqytqa sozylǵan rezonansty is boiynsha sot úkimi shyqty, dep habarlaidy dalanews.kz.
Time.kz málimetinshe, qaiǵyly oqiǵa 2023 jylǵy 21 aqpan kúni keshke Samara – Shymkent tas jolynyń 921-shaqyrymynda, Áiteke bi aýdany aýmaǵynda bolǵan.
“Tergeý málimetinde júk kóliginiń júrgizýshisi Ramazan Infýrov alda kele jatqan KamAZ kóligin basyp ozýǵa áreket jasaǵany aitylady. Alaida manevr sátsiz aiaqtalyp, onyń kóligi qarsy baǵytta kele jatqan Mitsubishi Montero Sport avtokóligimen soqtyǵysqan”, - deidi basylym.
Jol apaty saldarynan jol talǵamaityn kólikte otyrǵan erli-zaiypty men olardyń úsh kámeletke tolmaǵan balasy kóz jumdy. Apattan júk kóliginiń júrgizýshisi Ramazan Infýrov pen Mitsubishi kóligin basqarǵan Savina Jaqsylyqova ǵana aman qalǵan.
Alǵashynda tergeý organdary jol apatyna Jaqsylyqovany kináli dep tanyǵan. Alaida sot is materialdaryn jan-jaqty zerttep, jesir áieldiń kinásin dáleldeitin naqty aiǵaqtar joq degen qorytyndyǵa kelgen. Nátijesinde ol aqtalyp shyqqan.
Osydan keiin aiyp Ramazan Infýrovqa taǵylyp, onyń isi alqabilerdiń qatysýymen qaraldy. Sol kezde alqabiler júrgizýshini aqtap, oǵan zańsyz qylmystyq jaýapkershilikke tartylǵany úshin ótemaqy talap etý quqyǵyn bergen.
Degenmen is munymen aiaqtalǵan joq. Marqumdardyń jubaiy Savina Jaqsylyqova men prokýratýra apelliatsiialyq shaǵym túsirip, is qaita qaraýǵa jiberildi.
“Apelliatsiialyq sot alqabiler quramyn qalyptastyrý kezinde zań buzýshylyqtarǵa jol berilgenin anyqtaǵan. Atap aitqanda, alqabilerdiń biri irikteý barysynda-aq «sottalýshynyń kináli ne kinásiz ekenine qaramastan, aqtaý úshin daýys beremin» dep málimdegen. Al taǵy bir alqabi eki balasy baryn aityp, protseske qatysqysy kelmeitinin jetkizgen. Alaida bul jaittar eskerilmegen”, - dedi derekkóz.
Is ekinshi ret te alqabilerdiń qatysýymen qaraldy. Bul joly alqabiler Ramazan Infýrovtyń jol qozǵalysy erejelerin buzyp, abaisyzda tórt adamnyń ólimine sebep bolǵanyn dáleldengen dep tanydy.
Sot úkimimen ol 5 jylǵa bas bostandyǵynan aiyrylyp, 7 jyl merzimge kólik quralyn basqarý quqyǵynan aiyryldy. Sottalǵan azamat úkim jariialanǵannan keiin birden sot zalynda qamaýǵa alyndy.
Úkim zańdy kúshine engen joq. Sottalǵan azamat pen onyń qorǵaýshylarynyń sheshimge shaǵymdanýǵa múmkindigi bar.
