Aqtóbe qalasynyń turǵyny ózin qatelikpen qaıtys boldy dep tanyǵan medısınalyq mekemeni sotqa berip, moraldyq shyǵyn úshin ótemaqy óndirip aldy, dep habarlaıdy Dalanews.kz.

Oqıǵa 2025 jyldyń jazynda bolǵan. Aýrýhana derekqoryna qate málimet engizilip, sonyń negizinde azamattyq hal aktilerin tirkeý organdary er adamdy resmı túrde qaıtys boldy dep tirkegen. Qatelik tek bes kúnnen keıin ǵana túzetilgen.

Talapkerdiń aıtýynsha, osy ýaqyt aralyǵynda ol birqatar qıyndyqqa tap bolǵan. Atap aıtqanda, dári-dármek ala almaǵan, nesıe tóleý men salyqtyq mindettemelerdi oryndaý múmkin bolmaǵan.

Er adam moraldyq zıan úshin 1 mıllıon teńge ótemaqy talap etken. Al aýrýhana ókilderi bul jaǵdaıdy tehnıkalyq aqaýmen baılanystyryp, qate der kezinde túzetilgenin alǵa tartqan.

Alaıda sot medısınalyq uıym jibergen qatelik azamat pen onyń jaqyndaryna moraldyq zıan keltirýi múmkin ekenin moıyndap, aýrýhanany 200 myń teńge kóleminde ótemaqy tóleýge mindettedi.