Aqtóbede ondaǵan turǵyn shetelge demalysqa usha almai qalǵanyn aityp, týrfirmanyń ústinen shaǵym túsirdi. Klientterdiń sózinshe, joldama aqysyn tólegennen keiin kompaniia ókilderi bailanysqa shyqpai qoiǵan. Zardap shekkender keltirilgen shyǵyn kólemi júzdegen million teńgege jetkenin aitady, dep habarlaidy dalanews.kz KTK telearnasyna silteme jasap.
Týristerdiń biri Dinara Katannyń aitýynsha, qazirgi tańda anyqtalǵan jalpy shyǵyn kólemi 219 million teńge.
– Barlyq túbirtekter men qujattar qolymyzda bar. 69 adam jinalyp, aryz jazdyq. Biraq ázirge eshqandai nátije joq. Bizdiń talabymyz – bári zań aiasynda sheshilip, tólengen qarajat qaitarylýy kerek, – deidi ol.
Taǵy bir turǵyn Asylbek Dúisenbekov otbasymen birge 5-13 tamyz aralyǵynda Antaliiaǵa demalýǵa joldama alǵanyn aitady.
– Biz Almatyǵa óz qarajatymyzǵa jettik. Ushar aldynda biletter jiberiledi dep kútken edik. Alaida reiske bir kún qalǵanda týrdyń kúshi joiylǵanyn habarlady. Kompaniiaǵa shamamen 2 million teńge tóledim, – deidi ol.
Zardap shekkenderdiń aitýynsha, olar Túrkiia, Mysyr jáne Grýziiaǵa demalýdy josparlaǵan. Týrfirmany dostary men tanystary usynǵandyqtan, kópshiligi kompaniiaǵa senim artqan. Keibir klientter buǵan deiin de osy firmanyń qyzmetin paidalanyp, shetelge sátti baryp kelgenderin aitady.
Turǵyndardyń bir bóligi joldamalardy bólip tóleý arqyly rásimdegen. Soǵan qaramastan, sapar júzege aspasa da, olar tólemderin jalǵastyryp otyr. Sonymen qatar týrister ushatyn qala – Almatyǵa óz esebinen jetken.
Klientterdiń aitýynsha, bastapqyda kompaniia menedjerleri kezdesýlerdi keiinge shegerip, máseleni sheshýge ýáde bergen. Keiin qońyraýlar men habarlamalarǵa múldem jaýap bermei qoiǵan. Qazir zardap shekkender birigip, politsiiaǵa jappai aryz túsirip jatyr. Belgili bolǵandai, týrfirmaǵa qatysty alǵashqy shaǵym 6 tamyz kúni túsken. Búginge deiin resmi túrde 17 adam aryz bergen.
Aqtóbe oblystyq politsiia departamenti atalǵan fakti boiynsha qylmystyq is aiasynda tergeý bastalǵanyn málimdedi.
– Alaiaqtyq faktisi boiynsha sotqa deiingi tergep-tekserý júrgizilip jatyr. Sondai-aq kúdikti retinde anyqtalǵan tulǵanyń ornalasqan jerin anyqtaý maqsatynda jedel-izdestirý sharalary qolǵa alyndy, – dedi Aqtóbe oblystyq PD baspasóz qyzmetiniń jetekshisi Erbolat Sarqulov.
Qazirgi ýaqytta kompaniia iesiniń qaida júrgeni anyqtalyp jatyr.
