Aqtóbe oblysynyń prokýratýrasy jol-kólik oqiǵasyna qatysýshy R. Infýrovtyń qylmystyq isi boiynsha sot úkimine qatysty málimdeme jasady, dep habarlaidy Dalanews.kz.
Vedomstvonyń habarlaýynsha, is alqabilerdiń qatysýymen qaralyp, olardyń sheshimi negizinde sot R. Infýrovty kinásiz dep tanyp, aqtaý úkimin shyǵarǵan.
Eske salsaq, aiyptalýshy jol qozǵalysy qaǵidalaryn buzyp, saldarynan 4 adamnyń, onyń ishinde 3 kámeletke tolmaǵannyń qaza bolýyna ákep soqqan oqiǵaǵa bailanysty sotqa tartylǵan bolatyn. 2024 jyly osy jol apaty boiynsha jeńil kólik júrgizýshisi aiyptalǵanymen, sot júk kóligi júrgizýshisiniń kinásin kórsetken kýágerlerdiń turaqty aiǵaqtaryn eskerip, ony aqtaǵan.
Osydan keiin R. Infýrovqa qatysty qylmystyq is sotqa joldanǵan edi.
Prokýratýra ókilderi jýyrda jariialanǵan sot reportajynda istiń barlyq mán-jailary tolyq qamtylmai, birjaqty baǵalar berilgenin atap ótti. Sondai-aq jýrnalistik materialda tergeýshi men memlekettik aiyptaýshynyń jumysyna teris baǵa berilgeni jáne bul áreketter sotqa qysym kórsetý retinde qarastyrylýy múmkin ekeni aityldy.
Shyǵarylǵan úkimmen kelispegen Aqtóbe oblystyq prokýratýrasy ony joiý maqsatynda Aqtóbe oblystyq soty apelliatsiialyq ótinishhat joldaǵan.
Qylmystyq is boiynsha túpkilikti sheshimdi joǵary turǵan sot instantsiiasy qabyldaityn bolady.
