Aqtóbe oblysyndaǵy iri sý qoimalary kóktemgi tasqyn kezeńine daiyndaldy, dep habarlaidy Dala news.
«Qazsýshar» RMK Aqtóbe filialy Aqtóbe, Qarǵaly jáne Sazdy sý qoimalaryn kóktemgi sý tasqynyna daiyndaý boiynsha birqatar sharalardy júzege asyrǵan. Qazirgi ýaqytta óńirdegi úsh iri sý qoimasynda tasqyn sýlaryn qabyldaý jáne ótkizý úshin jetkilikti bos syiymdylyq qamtamasyz etilgen.
Atap aitqanda, Aqtóbe sý qoimasynyń bos syiymdylyǵy – 58% nemese 142 mln tekshe metr, Qarǵaly sý qoimasynda – 69% nemese 192 mln tekshe metr, al Sazdy sý qoimasynda – 61% nemese 4,5 mln tekshe metrden astam.
Buǵan deiin barlyq nysandarda kópfaktorly tekserýler júrgizilip, nátijesinde qaýipsizdik deklaratsiialary ázirlengen. Sonymen qatar Aqtóbe jáne Sazdy sý qoimalarynda paidalanýǵa berilgen sátten beri alǵash ret keshendi rekonstrýktsiia jasalǵan.
Tótenshe jaǵdailardyń aldyn alý maqsatynda úsh sý qoimasynda da oblystyq TJD ortalyq pýltimen biriktirilgen jergilikti habarlaý júieleri jumys isteidi. Bul júielerdiń baǵdarlamalyq qamtamasyz etýi jańartylyp, qosymsha radiostantsiialar satyp alynǵan.
Aqtóbe filialynyń direktory Rinat Shaýenovtiń aitýynsha, tasqyn qaýpin azaitýǵa baǵyttalǵan keshendi aldyn alý sharalary turaqty túrde júrgizilýde.
«Strategiialyq mańyzy bar nysandarda táýlik boiy kezekshilik uiymdastyrylǵan. Qaýipsizdik jáne kúzet rejimi kúsheitildi. Barlyq sý sharýashylyǵy nysandarynda inertti materialdar daiyndaldy, janar-jaǵarmai qory bar rezervtik dizeldi generatorlar qamtamasyz etilgen. Qazirgi ýaqytta sý qoimalary shtattyq rejimde jumys istep tur, jaǵdai turaqty baqylaýda», – dedi ol.
