Aqtóbe oblysynyń Shalqar qalasynda jappai tóbeles kezinde 17 jastaǵy oqýshynyń qaza bolýyna qatysty sot otyrysy bastaldy. Jasóspirimdi óltirdi degen aiyp 18 jastaǵy stýdentke taǵylyp otyr, dep habarlaidy dalanews.kz.
Stan.kz málimetinshe, oqiǵa 19 naýryzda bolǵan. Sol kúni aiyptalýshy anasynyń kóligin ruqsatsyz alyp, "Maiak" tobynyń múshelerimen birge qalanyń ekinshi shetine barǵan. Onyń júrgizýshi kýáligi bolmaǵan. Sondai-aq ózimen birge ańshylyq pyshaq alyp júrgen.
Jastar arasynda bolǵan jappai tóbeles kezinde 17 jastaǵy oqýshy júrek tusynan pyshaq jaraqatyn alyp, kóz jumǵan. Tergeý nusqasy boiynsha, aiyptalýshy qarý qoldanylýy múmkin ekenin aldyn ala bilgen.
Alaida sottalýshy adam óltirý boiynsha taǵylǵan aiypty moiyndamady. Onyń sózinshe, pyshaqty ózin qorǵaý úshin alyp shyqqan. Bir top jas ózine qarai júgirgen kezde ómirine qaýip tóndi dep qorqyp, qolyndaǵy pyshaqty sermegenin aitqan.
Sot otyrysynda aiyptalýshy marqumnyń otbasynan keshirim surap, ony óltirý oiy bolmaǵanyn málimdedi. Oqiǵadan keiin ol tóbeles bolǵan jerden qashyp, tehnikalyq qyzmet kórsetý stantsiiasynyń ǵimaratyna jasyrynǵan.
Qazirgi ýaqytta sot protsesi jalǵasyp jatyr. Qaza tapqan oqýshynyń týystary aiyptalýshyǵa qatań jaza taǵaiyndaýdy talap etýde.
