Aqtóbede kepilge alý jáne qos adam óltirý isi boiynsha prokýror kúdikti Basanovty ómir boiyna bas bostandyǵynan aiyrýdy surady, dep habarlaidy dalanews.kz Qazaqparatqa siltep.
Aqtóbe oblysynyń mamandandyrylǵan qylmystyq ister jónindegi mejraiondyq sotynda Sarsenbek Basanovqa qatysty is boiynsha jaryssóz ótti. Ol 2025 jyldyń qańtarynda áiel adamdy kepilge alǵan jáne sol oqiǵa barysynda zardap shekken áieldiń ata-anasyn óltirdi degen aiyppen sotqa tartylyp otyr.
Tergeý málimetinshe, áiel adamdy bosatý kezinde politsiia qyzmetkerleri Aqtóbedegi jeke turǵyn úidiń jertólesinen qart erli-zaiyptylardyń - kepilge alynǵan áieldiń ata-anasynyń - máiitin tapqan.
Sottaǵy jaryssóz kezinde prokýror Gúlzira Kósherbaeva aiyptalýshynyń kinási tolyq dáleldengenin atap ótti. Onyń aitýynsha, kýálardyń jaýaby, jábirlenýshilerdiń sózderi men saraptama qorytyndylary Basanovtyń qylmysyn naqty kórsetedi.
"Basanovtyń kinási tolyq dáleldenip, durys baǵalandy dep esepteimin. Onyń áreketi asa aýyr qylmystar sanatyna jatady. Kinásin jeńildetetin eshqandai jaǵdai joq. Ol psihiatr men narkologta esepte bolmaǵan, qylmys jasaǵan kúni es-túsinde, saý kúide bolǵan. Sol sebepti, QR Qylmystyq kodeksiniń 99-baby 2-bóliginiń 1, 3, 5-tarmaqtary, 126-baby 2-bóliginiń 3, 4-tarmaqtary jáne 127-babynyń 1-bóligi boiynsha kináli dep tanyp, ony ómir boiyna bas bostandyǵynan aiyrýdy suraimyn. Sonymen qatar, jábirlenýshilerdiń azamattyq talap-aryzdaryn tolyq qanaǵattandyryp, olarǵa moraldyq jáne materialdyq ótemaqy óndirýdi suraimyn", – dedi prokýror Kósherbaeva.
Jábirlenýshi tarap prokýrordyń talaptaryn tolyq qoldady.
Al aiyptalýshy Sarsenbek Basanov jaryssózde sóz alyp, ózin asa qatygez adam emespin dep sipattap, sottan jazany jeńildetýdi surady.
"Meniń jalǵyz anam jáne kishkentai balam bar. Men qatigez adam emespin. Kóp nárseni armandadym, otbasy quryp, baqytty ómir súrgim keldi. Anam keshe keldi, «endi seni kóre almaityn shyǵarmyn» dedi. Ómir súrýdi, balamdy ósirgim keledi. Ótinemin, jazany jeńildetińizder", – dedi ol.
