Aqtóbe oblysyndaǵy tasjolda adam ólimimen aiaqtalǵan jol apatynyń mán-jaiy belgili boldy. Qaza tapqan segiz adamnyń ishinde tórt bala bar, dep habarlaidy Dalanews.kz.
Oblys ákimdiginiń Telegram-arnasyndaǵy málimet boiynsha, keshe Aqtóbe - Astrahan tasjolynyń 120 shaqyrymynda Lada Largus jáne Toyota Hilux markaly eki kólik soqtyǵysty. Apattan Lada Largus órtengen. Aqtóbe oblystyq densaýlyq saqtaý basqarmasy basshysynyń mindetin atqarýshy Nurbol Tympiev oqiǵaǵa bailanysty túsinik berdi.
"2024 jylǵy 6 naýryzda Aqtóbe oblysynyń "Aqtóbe-Astrahan" tasjolynda 120 shaqyrymynda kólik apaty boldy. Zardap shekkenderdiń sany – 11, onyń ishinde 8 adam qaza tapty. 3 adam Muǵaljar aýdandyq aýrýhanasyna jetkizildi. Mamandar olarǵa qajetti kómekti kórsetip, tekserdi. Alaida, 3 adam Aqtóbe qalasynda "tekserýden ótemiz" dep, aýrýhanaǵa jatýdan bas tartqan", - dedi Nurbol Tympiev.
Aqtóbe oblystyq bilim basqarmasy basshysynyń orynbasary Nurgúl Bertileýova da bolǵan jaitqa qatysty pikir bildirdi.
"Búgin Aqtóbe-Astrahan tasjolynda qaiǵyly jol-kólik oqiǵasy boldy. Osy qaiǵyly oqiǵa saldarynan 8 adam qaza tapty. Onyń tórteýi kámeletke tolmaǵan balalar. Atap aitqanda, Shubarshy orta mektebiniń 4-6-synyp oqýshylary. Sondai-aq Keńqiiaq orta mektebiniń 6-synyp oqýshysy men daiyndyq tobynyń 1 oqýshysy. Balalardy ata-analary men týystarymen birge boldy. Oqýshylar zańdy ókilderiniń ótinishi boiynsha otbasylyq jáne densaýlyq jaǵdaiyna bailanysty sabaqqa qatyspaǵan", - dep túsindirdi Nurgúl Bertileýova.
Eske sala keteiik, keshe Aqtóbe-Astrahan tasjolynda eki kóliktiń qatysýymen jol apaty boldy.
