اقتوبە وبلىسىنداعى تاسجولدا ادام ولىمىمەن اياقتالعان جول اپاتىنىڭ ءمان-جايى بەلگىلى بولدى. قازا تاپقان سەگىز ادامنىڭ ىشىندە ءتورت بالا بار، دەپ حابارلايدى  Dalanews.kz.

وبلىس اكىمدىگىنىڭ Telegram-ارناسىنداعى مالىمەت بويىنشا، كەشە اقتوبە - استراحان تاسجولىنىڭ 120 شاقىرىمىندا Lada Largus جانە Toyota Hilux ماركالى ەكى كولىك سوقتىعىستى. اپاتتان Lada Largus ورتەنگەن. اقتوبە وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى نۇربول تىمپييەۆ وقيعاعا بايلانىستى تۇسىنىك بەردى.

"2024 جىلعى 6 ناۋرىزدا اقتوبە وبلىسىنىڭ "اقتوبە-استراحان" تاسجولىندا 120 شاقىرىمىندا كولىك اپاتى بولدى. زارداپ شەككەندەردىڭ سانى – 11، ونىڭ ىشىندە 8 ادام قازا تاپتى. 3 ادام مۇعالجار اۋداندىق اۋرۋحاناسىنا جەتكىزىلدى. ماماندار ولارعا قاجەتتى كومەكتى كورسەتىپ، تەكسەردى. الايدا، 3 ادام اقتوبە قالاسىندا "تەكسەرۋدەن وتەمىز" دەپ، اۋرۋحاناعا جاتۋدان باس تارتقان"، - دەدى نۇربول تىمپييەۆ.

اقتوبە وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا دا بولعان جايتقا قاتىستى پىكىر ءبىلدىردى.

"بۇگىن اقتوبە-استراحان تاسجولىندا قايعىلى جول-كولىك وقيعاسى بولدى. وسى قايعىلى وقيعا سالدارىنان 8 ادام قازا تاپتى. ونىڭ تورتەۋى كامەلەتكە تولماعان بالالار. اتاپ ايتقاندا، شۇبارشى ورتا مەكتەبىنىڭ 4-6-سىنىپ وقۋشىلارى. سونداي-اق كەڭقياق ورتا مەكتەبىنىڭ 6-سىنىپ وقۋشىسى مەن دايىندىق توبىنىڭ 1 وقۋشىسى. بالالاردى اتا-انالارى مەن تۋىستارىمەن بىرگە بولدى. وقۋشىلار زاڭدى وكىلدەرىنىڭ ءوتىنىشى بويىنشا وتباسىلىق جانە دەنساۋلىق جاعدايىنا بايلانىستى ساباققا قاتىسپاعان"، - دەپ ءتۇسىندىردى نۇرگۇل بەرتىلەۋوۆا.

ەسكە سالا كەتەيىك، كەشە اقتوبە-استراحان تاسجولىندا ەكى كولىكتىڭ قاتىسۋىمەن جول اپاتى بولدى.