"Aqtóbe" fýtbol klýbynyń basqarma tóraǵasy qyzmetine jańadan taǵaiyndalǵan Arman Ospanovtyń qatysýymen ótken baspasóz máslihaty janjalǵa ulasty. Klýbtyń bolashaǵy týraly baiandama jasap turǵan sátte zalǵa jankúierler kirip kelgen, dep habarlaidy Dalanews.kz.
Klýb jankúierleri Arman Ospanovtyń buǵan deiin áleýmettik jelilerde "Aqtóbe" klýbyna qatysty aitqan pikiri jazylǵan úlken plakattardy ala kelgen.
Plakattardyń birinde Ospanovtyń "Aqtóbe" men "Qairat" klýbtary arasyndaǵy shielenis týraly áleýmettik jelide jazǵan pikiri jariialanǵan. Jazbada "Aqtóbe" klýby men onyń jankúierlerine qatysty qorlaityn teńeýler qoldanylǵan.
Jankúierlerdiń aitýynsha, mundai kózqarastaǵy adam klýbty basqarmaýǵa tiis. Olar ózgeristerge, investitsiiaǵa jáne fýtboldyń damýyna qarsy emes ekenin, alaida klýbqa qurmetsizdik tanytqan basshyny qabyldamaitynyn málimdedi.
"Jankúierlerdi qorlaityn, itke teńeitin adamdy qabyldamaimyz. Onyń otstavkaǵa ketýin talap etemiz", - dedi jankúierler.
Klýb ókilderi jankúierlerdi zaldan shyǵarýǵa tyrysqan. Biraz ýaqyttan keiin Arman Ospanovtyń ózi de pikir bildirdi. Ol barlyq bilimi men tájiribesin "Aqtóbe" FK-niń damýyna baǵyttaitynyn aityp, jeke kózqarasyn klýbtan tys qaldyratynyna sendirdi.
