"اقتوبە" فۋتبول كلۋبىنىڭ باسقارما ءتوراعاسى قىزمەتىنە جاڭادان تاعايىندالعان ارمان وسپانوۆتىڭ قاتىسۋىمەن وتكەن باسپا ءسوز ءماسليحاتى جانجالعا ۇلاستى. كلۋبتىڭ بولاشاعى تۋرالى بايانداما جاساپ تۇرعان ساتتە زالعا جانكۇيەرلەر كىرىپ كەلگەن، دەپ حابارلايدى Dalanews.kz.
كلۋب جانكۇيەرلەرى ارمان وسپانوۆتىڭ بۇعان دەيىن الەۋمەتتىك جەلىلەردە "اقتوبە" كلۋبىنا قاتىستى ايتقان پىكىرى جازىلعان ۇلكەن پلاكاتتاردى الا كەلگەن.
پلاكاتتاردىڭ بىرىندە وسپانوۆتىڭ "اقتوبە" مەن "قايرات" كلۋبتارى اراسىنداعى شيەلەنىس تۋرالى الەۋمەتتىك جەلىدە جازعان پىكىرى جاريالانعان. جازبادا "اقتوبە" كلۋبى مەن ونىڭ جانكۇيەرلەرىنە قاتىستى قورلايتىن تەڭەۋلەر قولدانىلعان.
جانكۇيەرلەردىڭ ايتۋىنشا، مۇنداي كوزقاراستاعى ادام كلۋبتى باسقارماۋعا ءتيىس. ولار وزگەرىستەرگە، ينۆەستيسياعا جانە فۋتبولدىڭ دامۋىنا قارسى ەمەس ەكەنىن، الايدا كلۋبقا قۇرمەتسىزدىك تانىتقان باسشىنى قابىلدامايتىنىن مالىمدەدى.
"جانكۇيەرلەردى قورلايتىن، يتكە تەڭەيتىن ادامدى قابىلدامايمىز. ونىڭ وتستاۆكاعا كەتۋىن تالاپ ەتەمىز"، - دەدى جانكۇيەرلەر.
كلۋب وكىلدەرى جانكۇيەرلەردى زالدان شىعارۋعا تىرىسقان. ءبىراز ۋاقىتتان كەيىن ارمان وسپانوۆتىڭ ءوزى دە پىكىر ءبىلدىردى. ول بارلىق ءبىلىمى مەن تاجىريبەسىن "اقتوبە" فك-نىڭ دامۋىنا باعىتتايتىنىن ايتىپ، جەكە كوزقاراسىن كلۋبتان تىس قالدىراتىنىنا سەندىردى.
