Memleket basshysy Qasym-Jomart Toqaevtyń tóraǵalyǵymen Aqtaý qalasy mańyndaǵy ushaq apatyna bailanysty keńes ótti, - dep habarlaidy Dalanews.kz.
Prezident Mańǵystaý oblysynda bolǵan ushaq apatynan Qazaqstan azamattary da qaza tapqanyna toqtalyp, marqumdardyń otbasy men jaqyndaryna taǵy da kóńil aitty.
Qasym-Jomart Toqaev jedel kómek kórsetý qurylymdary apat kezinde shuǵyl ári úilesimdi áreket etkenine nazar aýdardy.
– Apattyń saldary budan da aýyr bolýy múmkin edi. Biz buǵan jol bergen joqpyz. Adam ómirin saqtap qaldyq. Qutqarý jumystary joǵary deńgeide júrgizildi. Qajetti aqparattyń barlyǵy jurtshylyqqa ýaqytyly berilip turdy. Iaǵni oqiǵa boiynsha tolyqqandy málimet bárine birdei usynyldy. Azamattarymyz alǵashqy minýttan bastap zardap shekkenderge kómek qolyn sozdy. Halqymyz janashyrlyq, uiymshyldyq jáne shynaiy tileýlestik qasietin kórsetti. Jurt kezekke turyp, qan tapsyrdy. Ázerbaijan elshiligi ǵimaratyna gúl shoqtaryn qoidy. Bul týraly elimizdiń jáne sheteldiń buqaralyq aqparat quraldary jan-jaqty málimet taratty. Qutqarýshylardyń, dárigerlerdiń jáne volonterlerdiń adal qyzmetine kúlli álem kýá boldy. Ásirese, kórshiles ári seriktes elder – Ázerbaijan, Resei, Qyrǵyzstan azamattary airyqsha alǵys bildirip jatyr, – dedi Memleket basshysy.
Prezident Úkimetke apat saldaryn joiýǵa atsalysqan adamdardyń erligi men eńbegin laiyqty atap ótý, erekshe kózge túsken azamattardy memlekettik nagradaǵa usyný jóninde tapsyrma berdi.
Sonymen qatar, Memleket basshysy Úkimettik komissiiaǵa zardap shekken shetel azamattaryna qajetti meditsinalyq jáne psihologiialyq turǵydan tolyq kómek berýdi, qaitys bolǵan Qazaqstan azamattarynyń týǵan-týystaryna airyqsha qamqorlyq kórsetýdi tapsyrdy.
Úkimettik komissiia men Bas prokýratýraǵa basqa quzyretti organdarmen birlesip, ushaq apatyna jan-jaqty ári obektivti tergeý júrgizý mindeti júkteldi.
Prezidenttiń pikirinshe, bul rette aqparattyq arandatý men feikke jol bermeý mańyzdy. Budan bólek, Qasym-Jomart Toqaev elimizdegi aviatsiialyq qaýipsizdiktiń jai-kúiin muqiiat tekserý qajet ekenin málimdedi.
Keńes barysynda Úkimettik komissiia tóraǵasy, Premer-Ministrdiń orynbasary Qanat Bozymbaev, Bas prokýror Berik Asylov, Ulttyq qaýipsizdik komitetiniń tóraǵasy Ermek Saǵymbaev, Ishki ister ministri Erjan Sádenov jáne Densaýlyq saqtaý ministri Aqmaral Álnazarova baiandama jasady.
