مەملەكەت باسشىسى قاسىم-جومارت توقايەۆتىڭ توراعالىعىمەن اقتاۋ قالاسى ماڭىنداعى ۇشاق اپاتىنا بايلانىستى كەڭەس ءوتتى، - دەپ حابارلايدى Dalanews.kz.
پرەزيدەنت ماڭعىستاۋ وبلىسىندا بولعان ۇشاق اپاتىنان قازاقستان ازاماتتارى دا قازا تاپقانىنا توقتالىپ، مارقۇمداردىڭ وتباسى مەن جاقىندارىنا تاعى دا كوڭىل ايتتى.
قاسىم-جومارت توقايەۆ جەدەل كومەك كورسەتۋ قۇرىلىمدارى اپات كەزىندە شۇعىل ءارى ۇيلەسىمدى ارەكەت ەتكەنىنە نازار اۋداردى.
– اپاتتىڭ سالدارى بۇدان دا اۋىر بولۋى مۇمكىن ەدى. ءبىز بۇعان جول بەرگەن جوقپىز. ادام ءومىرىن ساقتاپ قالدىق. قۇتقارۋ جۇمىستارى جوعارى دەڭگەيدە جۇرگىزىلدى. قاجەتتى اقپاراتتىڭ بارلىعى جۇرتشىلىققا ۋاقىتىلى بەرىلىپ تۇردى. ياعني وقيعا بويىنشا تولىققاندى مالىمەت بارىنە بىردەي ۇسىنىلدى. ازاماتتارىمىز العاشقى مينۋتتان باستاپ زارداپ شەككەندەرگە كومەك قولىن سوزدى. حالقىمىز جاناشىرلىق، ۇيىمشىلدىق جانە شىنايى تىلەۋلەستىك قاسيەتىن كورسەتتى. جۇرت كەزەككە تۇرىپ، قان تاپسىردى. ازەربايجان ەلشىلىگى عيماراتىنا گۇل شوقتارىن قويدى. بۇل تۋرالى ەلىمىزدىڭ جانە شەتەلدىڭ بۇقارالىق اقپارات قۇرالدارى جان-جاقتى مالىمەت تاراتتى. قۇتقارۋشىلاردىڭ، دارىگەرلەردىڭ جانە ۆولونتەرلەردىڭ ادال قىزمەتىنە كۇللى الەم كۋا بولدى. اسىرەسە، كورشىلەس ءارى سەرىكتەس ەلدەر – ازەربايجان، رەسەي، قىرعىزستان ازاماتتارى ايرىقشا العىس ءبىلدىرىپ جاتىر، – دەدى مەملەكەت باسشىسى.
پرەزيدەنت ۇكىمەتكە اپات سالدارىن جويۋعا اتسالىسقان ادامداردىڭ ەرلىگى مەن ەڭبەگىن لايىقتى اتاپ ءوتۋ، ەرەكشە كوزگە تۇسكەن ازاماتتاردى مەملەكەتتىك ناگراداعا ۇسىنۋ جونىندە تاپسىرما بەردى.
سونىمەن قاتار، مەملەكەت باسشىسى ۇكىمەتتىك كوميسسياعا زارداپ شەككەن شەتەل ازاماتتارىنا قاجەتتى مەديسينالىق جانە پسيحولوگيالىق تۇرعىدان تولىق كومەك بەرۋدى، قايتىس بولعان قازاقستان ازاماتتارىنىڭ تۋعان-تۋىستارىنا ايرىقشا قامقورلىق كورسەتۋدى تاپسىردى.
ۇكىمەتتىك كوميسسيا مەن باس پروكۋراتۋراعا باسقا قۇزىرەتتى ورگاندارمەن بىرلەسىپ، ۇشاق اپاتىنا جان-جاقتى ءارى وبەكتيۆتى تەرگەۋ جۇرگىزۋ مىندەتى جۇكتەلدى.
پرەزيدەنتتىڭ پىكىرىنشە، بۇل رەتتە اقپاراتتىق ارانداتۋ مەن فەيككە جول بەرمەۋ ماڭىزدى. بۇدان بولەك، قاسىم-جومارت توقايەۆ ەلىمىزدەگى اۆياسيالىق قاۋىپسىزدىكتىڭ جاي-كۇيىن مۇقيات تەكسەرۋ قاجەت ەكەنىن مالىمدەدى.
كەڭەس بارىسىندا ۇكىمەتتىك كوميسسيا ءتوراعاسى، پرەمەر-مينيستردىڭ ورىنباسارى قانات بوزىمبايەۆ، باس پروكۋرور بەرىك اسىلوۆ، ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆ، ىشكى ىستەر ءمينيسترى ەرجان سادەنوۆ جانە دەنساۋلىق ساقتاۋ ءمينيسترى اقمارال ءالنازاروۆا بايانداما جاسادى.
