Ázerbaıjannyń Minval basylymy 1 shildede reseılik áýe shabýylyna qarsy kúshterdiń kapıtany Dmıtrıı Paladıchýktyń túsiniktemesine negizdelgen málimetterdi jarıalady. Qujatta 2024 jylǵy 25 jeltoqsanda Groznyıǵa baǵyt alǵan Azerbaijan Airlines (AZAL) áýe kompanıasyna tıesili Embraer 190 ushaǵyna oq atý buıryǵyn dál osy kapıtan bergeni aıtylǵan, dep habarlaıdy Dalanews.kz.
Minval jazýynsha, redaksıaǵa aty-jóni kórsetilmegen derekkózden "sensasıalyq materıaldar" kelip túsken. Olardyń ishinde ushaqqa shabýyl jasalǵan sáttiń vıdeojazbasy men aýdıofaıldary da bar.
Paladıchýktyń túsiniktemesinde Embraer 190 ushaǵy naqty atalmaıdy. Onda tek "tuman saldarynan kózge anyq kórinbeıtin nysana" jaıly baıandalady. Kapıtan bıiktigi men jyldamdyǵyn baıandap, 51-dıvızıanyń áskerı komandalyq pýnktine belgisiz áýe nysanasy týraly habarlaǵan. Osydan keıin nysanany joıý týraly buıryq alyp, operatorǵa shabýyl jasaýǵa pármen bergen. Alǵashqy zymyran nysanaǵa dóp tımegen soń, ekinshi ret atýǵa buıryq beredi.
The Insider basylymynyń dereginshe, Dmıtrıı Paladıchýk Reseıdiń áýe shabýylyna qarsy qorǵanys bólimderinde, sonyń ishinde 14-armıa quramynda qyzmet atqarǵan. Ol óziniń túsinikteme jazǵanyn telefon arqyly rastaǵan. Paladıchýk jazbasyndaǵy "ó" árpin jazý stıli ekeni, al daýysy ázerbaıjandyq aqparat quraldary jarıalaǵan vıdeodaǵy daýyspen sáıkes kelgeni aıtyldy.
Eske salsaq, AZAL kompanıasynyń Embraer 190 jolaýshylar ushaǵy 2024 jylǵy 25 jeltoqsanda Bakýden Groznyıǵa baǵyt alǵan kezde Aqtaý mańynda apatqa ushyrady. Ushaq bortynda bes ekıpaj múshesimen birge 67 adam bolǵan. Qaıǵyly oqıǵa saldarynan 38 adam kóz jumyp, 29 jolaýshy aman qalǵan.
