Áleýmettik jelide Aqtaýdaǵy ushaq apatynan aman qalǵan 48 jastaǵy Sýbhonk Rahımovtyń vıdeosy tarady. Ol apat bolǵan oryndy taspaǵa tartqan kezde, qutqarýshylardyń ózara áńgimesi de kameraǵa jazylyp qalǵan. Sóz barysynda zań buzýshylyqtyń aldyn alýǵa qatysty mańyzdy eskertýler jasalǵany baıqalady, dep habarlaıdy Dalanews.kz.
Vıdeodan bir top qutqarýshynyń oqıǵa ornyna kómekke kelgenin ańǵarýǵa bolady. Olar abyr-sabyr kúıde aınalasyn muqıat baqylap júr. Sol sátte aralarynda áldekimniń daýysy jarqyn shyǵady. Ol áriptesterine mańyzdy eskertý jasaıdy.
“Bul jerdi vıdeoǵa jáne sýretke túsirmeńder! Qajeti joq”, — deıdi vıdeoda belgisiz daýys ıesi.
Budan ańǵaratynymyz, eger qandaı da bir oqıǵanyń kýási bolyp jatsańyz, ony birden taspaǵa tartýǵa asyqpańyz. Sebebi bul zań buzýshylyq bolyp sanalýy múmkin.
Aıta keteıik, buǵan deıin Aqtaýda ushaq apaty bolǵan jerdi sýretke túsirgen bloger Azamat Sársenbaev qamaýǵa alynǵany týraly jazǵan edik.
Bul týraly blogerdiń advokaty Aıbek Súıindikov habarlady.
"Mańǵystaý oblysy Túpqaraǵan aýdandyq sotynyń úkimimen Azamat Sársenbaev Ákimshilik quqyq buzýshylyq jasaǵany, ıaǵnı quqyq qorǵaý organynyń qyzmettik mindetterin oryndaýyna baılanysty onyń zańdy talabyna baǵynbaǵany úshin kináli dep tanyldy. Sot tarapynan 10 táýlikke ákimshilik qamaýǵa alý túrindegi jaza taǵaıyndaldy. İstiń mán-jaıyn eskere otyryp, sot QR ÁQBtK-niń 667-babynyń 1-bóliginiń sanksıasy sheginde, onda ákimshilik qamaýdyń eń uzaq merzimi 15 táýlik dep belgilengen, jaza qoldandy", — deıdi advokat.
Sottyń qaýlysy zańdy kúshine engen joq.
Eske salaıyq, 25 jeltoqsanda Aqtaýda ushaq apatqa ushyraǵan jerdi túsirgen bloger ustalǵany belgili boldy.
Bloger bul týraly Instagram paraqshasynda jazdy.
"Meni ustady. Aqtaý qalalyq polısıa basqarmasyna bara jatyrmyn. Ushaq apatqa ushyraǵan jerdi túsirgenim úshin ustaǵan bolýy múmkin", - dedi ol.
Mańǵystaý oblysynyń PD málimetinshe, Sársenbaev qoǵamdyq tártipti buzǵany úshin ustalǵan.
"Ol oqıǵa ornynda dron ushyryp, qutqarý jáne tergeý jumystaryna kedergi keltirdi jáne polısıa qyzmetkerleriniń zańdy talaptaryna baǵynbady. Qazir quqyqbuzýshy polısıa basqarmasyna jetkizildi, oǵan qatysty qoldanystaǵy zańnamaǵa sáıkes sharalar qabyldanady", - dedi polısıa.
Aıta keteıik, buǵan deıin bloger dron kómegimen Aqtaýdaǵy jolaýshylar ushaǵy apatqa ushyraǵan jerdi sýretke túsirip, jarıalaǵan bolatyn.
