Aqtóbe garnizonynyń áskeri soty qyzmet babyn asyra paidalanǵan 42 jastaǵy serjantqa úkim shyǵardy. Aqtaýdaǵy 25744 áskeri bóliminiń vzvod komandiri eki sarbazdy temeki tuqylyn jeýge májbúrlep, olardyń birin soqqyǵa jyqqan, dep habarlaidy Dalanews.kz.
Tergeý materialdaryna sáikes, serjant Kerimov meditsinalyq rota aýmaǵyn tazalaý kezinde jerde jatqan temeki tuqylyn taýyp, ony sarbazdarǵa jegizgen. Biraz ýaqyttan keiin olardyń biri ózin nashar sezinip, meditsinalyq kómekke júgingen.
Kelesi kúni serjant bólmedegi tártipsizdikke ashýlanyp, sol eki sarbazdy qaita shaqyryp alǵan. Olardyń birin birneshe ret teýip, fizikalyq jaza qoldanǵan.
Sot barysynda Kerimov ózine taǵylǵan aiyptardy moiyndamady. Onyń aitýynsha, sarbazdarǵa tek sógis jariialaǵan, al zorlyq-zombylyq áreketteri bolmaǵan. Alaida jábirlenýshilerdiń biri atalǵan oqiǵany rastady. Al ekinshi sarbaz eshqandai shaǵymy joq ekenin jetkizdi.
Sot sheshimi boiynsha serjant 2 jylǵa bas bostandyǵyn shekteý jazasyna kesildi. Sonymen qatar jyl saiyn 100 saǵat qoǵamdyq jumys isteýge mindetteldi.
