Mańǵystaý oblysynyń prokýratýrasy Aqtaý ákimdiginiń kásipkerge Kaspii teńizi jaǵalaýynan jer telimin zańsyz bergenin anyqtady, dep habarlaidy Dalanews.kz.
Tekserý barysynda Mańǵystaý oblysynda jerdi zańsyz berý jáne maqsatyna sai paidalanbaý faktileri anyqtalǵan.
"Qala ákimdigi seriktestikke negizgi jer telimi igerilmegenine qaramastan, teńiz jaǵalaýynan qosymsha 0,5 gektar jer bólgen. Sot sheshimimen bul jer memleket menshigine qaitaryldy", - delingen prokýratýra málimetinde.
Sondai-aq qala aýmaǵynda memleket menshigindegi jerlerdi zańsyz iemdenýdiń toǵyz deregi tirkelgen. Tiisti tulǵalarǵa jalpy somasy 2 million teńgeden astam aiyppul salynǵan.
Jalpy, biyl Mańǵystaý oblysynda 91 myń gektar aýmaqtaǵy 87 jer telimi memleket menshigine qaitarylǵan. Olardyń naryqtyq quny shamamen 800 million teńge dep baǵalanýda.
Budan bólek, 83 myń gektar jaiylymdyq jer de keri qaitarylǵan – sebebi jer ielerindegi mal basy jaiylymǵa túsetin júkteme normativine sai kelmegen, iaǵni jer tek formaldy túrde paidalanylyp kelgen.
